Гьар жуьреда тухузва инсанри чпин уьмуьрар. Садбур, югъ-йиф талгьана, девлетар кIватIиз, гъазаватда ава. Муькуьбуру дуьнья мадни гуьзеларун патал яратмишзава, чпин гъилералди къвезмай несилар патал ядигарар гьазурзава. Масадбуру лагьайтIа, пел чилел эцигиз вахчуз, Женнетдихъ вил галаз, Сад Аллагьдивай чпин гунагьрилай гъил къачун тIалабзава. Абурун арада сабурлудаказ, халкьдин дуланажагъ хъсанарунин ва адан руьгь хкажунин фикирдал алай, чпин кIвалах лап хъсандиз тешкилиз алахънавай мергьяматлу инсанарни ава.
Абурукай сад Нурудинан руш Мусаева Секинат я. Дагъустандин культурадинни искусстводин колледжда чирвилер къачур ханумдиз 1974-йисалай республикадин А.С. Пушкинан тIварунихъ галай библиотекада (2004-йисалай ам Р. Гьамзатован тIварунихъ янава) библиотекарвиле кIвалахун кьисмет хьана. Чирвилерихъ къаних руша гуьгъуьнлай ДГУ-дин филологиядин факультетдин библиотекайрин отделенини заочнидаказ акьалтIарна. Библиотекада мукьвал-мукьвал кьиле тухузвай мярекатар Секинатан зегьметдин гьунарар я. Адан тешкиллувилик кваз и идарада милли шииратдин цIийи яратмишунрихъ галаз таниш жедай гуьруьшар, ктабрин презентация ва авторрин хайи йикъариз талукьарнавай межлисар, ктабрин выставкаяр ва маса мярекатар кьиле физва.Секината меркезда кIелзавай студентриз меслятар гузва, абурун дипломрин кIвалахриз рецензияр кхьизва, газетра, журналра библиотекадин кIвалахдикай макъалаяр чапзава.
Ада “Куьредин ярар” культурадин тешкилатдихъ галазни сих алакъаяр хуьзва. Хъсан чирвилер, мярекатар тешкилдай алакьунар авай, вичин кIвалахдал рикI алай и милайим дишегьли Россиядин Федерациядин культурадин министерстводин, библиотекадин руководстводин патай гьуьрметдин грамотайриз лайихлу хьанва.
Зегьметдин ветеран, РД-дин культурадин лайихлу къуллугъчи Мусаева Секинат хьтин инсанар чи халкьдин къизилдин фонд я.
Секинат вах, вахъ мадни еке агалкьунар хьурай!
А. Агьмедпашаев,
“Куьредин ярар” культурадин центрадин председатель,
РФ-дин журналистрин Союздин член
