11-майдиз Дагъустандин образование вилик тухунин институтда (ДИРО), 2021-йисуз государстводин нетижаяр кьадай аттестациядиз (ГИА) талукь яз, республикадин районрин ва шегьеррин образованидин управленийрин начальникрихъ галаз совещание хьана.
Мярекат РД-дин образованидин ва илимдин министрдин сад лагьай земестителдин везифаяр тамамарзавай Мегьамед Абидова ачухна. Ада веревирд авун лазим тир месэлайрикай лагьана. ИкI, совещанидал 2021-йисуз мектебар акьалтIарзавай жаванри Государстводин нетижаяр кьадай аттестация кьиле тухун тешкилунин ва Вирироссиядин ахтармишунардай кIвалахар кьиле тухунин гьахълувилин месэлаяр веревирдна.
Информация гьялунин центрадин руководитель Аскандар Мегьамедова ГИА-диз гьазурвал аквазвай жуьредикай суьгьбетна: ГИА тухудай вахтунда кIвалахдай кадрияр тайинарнава, вири чкайра вердишвал къачун патал лазим имтигьанар кьиле тухванва, лазим кьадар апробацияр авунва. Ада гьакIни имтигьанар ва анра тешкиллувал таъминарун патал лазим мярекатар кьиле тухудай йикъар малумарна, ГИА-диз гьазурвал акунин ва ам кьиле тухунин жигьетдай тамам делилар агакьарна.
Образованидин хиле гуьзчивал авунин управленидин отделдин начальник Жамиля Агьмедовади имтигьанар тухузвай чкайрин (ППЭ) руководителри ва тешкилатчийри рехъ гузвай гъалатIрин статистикадихъ галаз танишарна ва аттестациядин вахтунда мукьвал-мукьвал арадал къвезвай четин месэлайрикай лагьана.
“Эгер руководителриз ва тешкилатчийриз лазим чирвилер тахьуни аялрин ихтиярар чIурунал гъизватIа, и кардиз талукь яз административный серенжемар кьабулда. Чна имтигьанар кьиле тухузвай чкайрин руководителривай вири крар гьахълудаказ, ерилудаказ ва алцифдаказ кьиле тухун патал жезмай кьван чалишмишвилер авун, и рекье герек кIвалахар тамамарун тIалабзава”, — кьетIендиз къейдна Жамиля Агьмедовади.
ДИРО-дин ректордин везифаяр тамамарзавай Гуьлнара Агьмедовади имтигьанар кьиле тухузвай чкайрал жезвай къайда чIурзавай дуьшуьшар ва алатай йисуз ВПР-дин вахтунда малум хьайи четин месэлаяр къейдна.
“Мектеб акьалтIарзавай жегьилдин чирвилериз къимет гудай серенжемар кьиле тухунин регламентда къалурнавай къайдайрилай ва серенжемрилай къерех хьайи гьар са дуьшуьш образованидин ва илимдин министерстводи ахтармишда. ОГЭ ва ЕГЭ образованидин идарайра чирвилер гунин гьерекат тешкилунин нетижаяр къалурзавай серенжемар я. Чирвилер гунин гьерекат, школьникри мектеб акьалтIардалди вахкузвай имтигьанар дуьздаказ тешкилун иллаки важиблу я”, — къейдна Мегьамед Гьабибовича.
Аскандар Мегьамедова рикIел хкайвал, 15-майдиз государстводин имтигьанрин комиссиядин членри, ППЭ-рин ва образованидин идарайрин руководителрихъ галаз санал имтигьанар вахкудай чкайрин гьазурлухвилин гьал ахтармишда, 18-майдиз лагьайтIа, вири чкайрин вири аудиторийра абурун гьазурвал мад сеферда тестикьарун, вердишвал къачун патал сифтегьан ЕГЭ кьиле тухуда.
«Лезги газет»
