Мергьяматлувал

Сив хуьнин сувар мукьва жезвай йикъара Туьркияда авай лезги диаспоради Сулейман-Стальский райондиз садакьа патал пулдин такьатар ракъурна.

Диаспорадин векил сифте нубатда райондин регьбер Нариман Абдулмуталибовахъ галаз гуьруьшмиш хьана. Малум хьайивал, гуьруьшдин сергьятра аваз диаспорадин векилди 327 агъзур манат пул райондин имамрин советдин председатель Гь.Амахановав вахкана. И кардин гьакъиндай малуматар райадминистрациядин сайтдани раижнава.

Гуьруьшдал къарар кьабулуналди, садакьадин такьатрихъ райондин хуьрера рамазандин вацра сив хкудунин мярекатар-ифтарар тешкилна. Идалайни гъейри, пак вацран вахтунда 57 агъзур манат пул эменни тIимил авай, яшайишдин жигьетдай дарда авай хизанриз куьмек патал чара авуна.

Ата-бубайрин ватан патал мергьяматлу кар авун­вай­ Туьркияда авай лезгийриз райондин кьил Н.Абдул­мута­либова чухсагъул малумарна. Къейд авурвал, пак вацран вахтунда динэгьлияр регьимдин крар кьилиз акъудиз алахъзава, патав гвайбуруз куьмекар гузва. Пак вац­ра инсанар агудзава, медениятдинни та­рихдин ала­къаяр мягькемаруниз куьмекзава. “Туьркияда авай лезги диас­порадин векилри чпин ата-бубаяр рикIера хуьнин, багъри­ ватандиз гьуьрмет авунин лайихлу чешне къалурна. Са­да муькуьдаз куьмекунин, арада авай рафтарвилер мадни хъсанарунин камар чнани къачуда”, — лагьана райондин кьили.

“Лезги газетди” алатай йисара хабар гайивал, Туьр­киядай лезги диаспорадин са жерге векилар Дагъустандиз хтанай. Абуру Махачкъалада, Сулейман-Стальский районда багъри чилин агьалийрихъ, жемиятдин тешкилатрихъ галаз гуьруьшар тешкилна.

Ата-бубайрин накьвадивай яргъаз акъатнаватIани, Туьркияда уьмуьр кьиле тухузвай лезгийри чпин эсил-не­­­сил, хайи чIал хуьз алахъзава, жегьилриз чизвач­тIа­ни, са кьадар яшар тамам хьанвайбур лезги чIалал рахазва.

Сулейман-Стальский райондин регьбердиз диаспорадихъ галаз алакъаяр мадни мягькемардай къаст ава. Им важиблу ва баркаллу кар я.

«Лезги газет»