Дербент

Къадим шегьерди Гъалибвилин суварин либас алукlнава. Кьилин куьчейра ва май­дан­дал пайдахри, жуьреба-жуьре рангарин шарари лепе гузва.

Суварин мярекатдив,  адет хьанвайвал, шегьердин военкоматда гатlунна.

Экуьнилай дяведин манийрин, музыкадин  ван алай иниз Ватандин Чlехи дяведин ветеранар кlватl жез башламишна. Суварин къайдада безетмишнавай столрихъ ацукьнавай ветеранар шегьердин кьил Рустамбег Пирмегьамедова, депутатрин собранидин председатель Мегьамед Мегьамедова, жемиятдин  тешкилатрин векилри, администрациядин къуллугъчийри ва масабуру къаршиламишна.

Ветеранриз сувар тебрикайдалай гуь­гъуь­низ вири, цуьквералди, ло­зунгралди, шараралди безетмишнавай машинра акьах­на, Женгинин Баркаллувилин паркуниз фена, эбеди цlун патав цуькверин кlунчlар эцигна.

Машинрин колонна физвай рехъ тирвал, ветеранриз сувар тебрикиз, салам гуз, гъилера шарар, цуьквер ва пайдахар­ аваз  школайра кlелзавай аяларни студентар акъвазнавай­.

Шад мярекат аскерар кучукнавай стхавилин сурара давам хьана.

Чlехи Гъалибвилин 76 йис тамам хьуниз талукьарнавай шадвилин митинг шегьердин кьили ачухна. Майдандал кlватl хьанвай вирибурухъ элкъвена, ада  лагьана: “Гъалибви­лин сувар — им чи халкьарин виридалайни чlе­хи сувар я. Дуьньядин тарихда виридалайни гзаф ивияр экъичай а залум дяведи ви­чин гел тун тавур хизан хьанач. Чlехи Гъалибвал — им неинки армиядин, гьакI вири халкьдин гъалибвал я.

Тарихдин метлеб авай Гъалибвал чи аскеррини офицерри къалурай кьегьалвилин, далу пата карханайра, майишатра югъди — йифди кlвалахай зегьметчийрин гьакъисагъ зегьметдин нетижани хьана. Чна Гъалибвал къазанмишуник  ла­йихлу пай кутур вири дербентвийрал дамахзава. Квез сувар мубаракрай!”.

Къагьриман Ибрагьимов

Мегьарамдхуьр

Гъалибвилин суварин гьуьрметдай Мегьарамдхуьруьн райондин  агьалийри Ватандин ЧIехи дяведа телеф хьайибуруз хкажнавай памятникдал цуьквер эцигна. И серенжемда райондин администрациядин кьил Фарид Агьмедова, администрациядин коллективди, идарайрин, жемиятдин организацийрин, яшлу несилдин векилри, школьникри, волонтерри иштиракна. Суварик иштиракзавай дестеяр, дяведа Советрин Союздин 27 миллиондилай виниз телеф хьайибур рикIел хкун патал са декьикьада кисна акъвазна.

Гитлеран фашизмдал гъалибвал къачун регьят акъвазнач. Мегьарамдхуьруьн райондай фронтдиз 2 агъзурдалай виниз инсанар фена. Абурун са пай женгерин майданра телеф хьана. Гьайиф хьи, алай вахтунда районда дяведа иштиракай са ветеранни амач. Амма далу патан фронтда зегьмет чIугур инсанар, дяведин ветеранрин хендедаяр, абурун хизанрин жаван несилар ама. Абуруз баркалла!

— Россиядин пак тарих рикIера хуьнин кардик гьар са агьа­лиди вичин пай кутун лазим я. Тарихдин важиблу вакъиаяр чна гележегдин несилрални агакьарна кIанда, — лагьана райондин администрациядин кьил Ф.Агьмедова.

Гъалибвилин суварин вилик райондин Муьгъверганрин хуьре дяведа телеф хьайи ватанэгьлийриз эцигнавай стеллани ачухна.

Чи мухбир

Кьасумхуьр

Сулейман-Стальский районда Гъалибвилин 76 йисаз бахшнавай мярекатар экуьнин сятдин  9-даз “Эбеди цIай” аскервилин баркалладин мемориальный комплексдал цуьквер эци­гунилай гатIунна. И серенжемда райондин администрациядин кьил Нариман Абдулмуталибова, РД-дин Халкьдин Соб­ра­ни­дин депутат Гьамидуллагь Мегьамедова, райондин соб­ранидин председатель Штибег Мегьамедханова, военный ко­миссар Рейзудин Женетова, райадминистрациядин управле­нийрин къуллугъчийри, школьникри, юнармиядин ва волон­тер­рин дестейри, жемиятдин организацийрин векилри иштиракна.

Н.Абдулмуталибова райондин агьалийриз Гъалибвилин сувар тебрикна. Шадвилин митингдин иштиракчияр, Ватандин­ ЧIехи дяведа телеф хьайибур рикIел хкуналди, са де­кьи­кьада кисна акъвазна.

Суварин митингдал Гь.Мегьамедов, Р.Женетов рахана       ва абуру райондин агьалийри гьам женгерин майданра, гьам зегьметда къалурай кьегьалвилерикай, гъалибвилик кутур паюникай ихтилатна. Гуьгъуьнлай кIватI хьанвайбуруз  еке концерт гана.

Ахцегь

9-Май. Фашистрин чапхунчийрихъ галаз чIугур залум дя­ве куьтягь хьана 76 йис алатнава. Несилрин рикIера бубайрин зурба игитвал эбеди я. Ватан кIеве гьатай лап четин шар­тIара абурулай, чпин садвал, игитвал, ватанпересвал къалуруналди, къуватлу ва фендигар душмандин хура акъвазиз, тарихдин метлебдин Гъалибвал къазанмишиз алакьна.

Райцентрадин кьилин куьчеяр, майданар, паркар сувар тебрикзавай махсус лозунгралдини пайдахралди чIагурнава. Валентин Эмирован тIварунихъ галай ял ядай багъда Игитрин аллеяда (ана Ватандин ЧIехи дяведин иштиракчийрин шикилар эцигнава) райондин жегьилрин парламентдин векилри “Георгиян лент”, “РикIел хуьнин вахта” акцияр кьиле тухузва.

Районда Гъалибвилин чIехи парад тешкилдай мумкинвал хьаначтIани, Ватан патал чанар гайи кьегьалар лайихлудаказ рикIел хкана. Сятдин кIуьд. Кьиле райондин регьбер Осман Абдулкеримов аваз райадминистрациядин къуллугъчияр, идарайринни карханайрин руководителар, зегьметдин ветеранар, гъиле цуькверни шарар авай школьникрин дестеяр ва погранчастунин векилар Малик Гъаниеван тIварунихъ галай РДК-дин вилик кIватI хьана. Сада-садаз сувар мубаракна, ри­­кIел аламукьдай шикилар яна, абур Игит — лётчик Валентин Эмирован памятникдал, Игитрин аллеядал фена ва цуьквер эцигна.

Суварин кьилин серенжем Баркаллувилин обелискдал давам хьана. Суварин иштиракчийри Ахцегь РВК-дай дяведиз тухвай пуд вишев агакьна аскеррин гьуьрметдай хкажнавай гуьмбетдал цуьквер эцигна, сергьятчи аскерри са­лют яна, са  декьикьада кисна акъвазна.

Дашдемир Шерифалиев

Кьурагь

9-Майдин экуьнилай Кьурагьрин хуьруьн майдандал агьа­лияр кIватI жез башламишна. Ватандин ЧIехи дяведин 1941-1945-йисара фашизм лугьудай душмандал къачур Гъалибви­лин 76 йисаз бахшнавай шадвилин мярекатда Кьурагь район­дин администрациядин кьил Замир Азизова, администрация­дин къуллугъчийри, юкьван школайрин коллективри, идарай­рин, жемиятдин организацийрин векилри иштиракна.

КIватI хьанвайбуру  дяведин йисара телеф хьайибурун гьуьрметдай туькIуьрнавай обелискдал цуьквер эцигна. Шадвилин митингдал райондин кьил З.Азизова, ветеранрин ва агъсакъалрин советдин председатель Ф.Мирзоева ва дишегьлийрин советдин председатель Э.Исаевади районэгьлийриз сувар тебрикна.

Райондин культурадин идарайрин гьевескарри ватанпересвилин манийрин еке концерт гана. Манидарри лезги, урус, агъул чIаларал “День Победы”, “Эсед”, “Буба”, “Дуьнья”, “Бессмертный полк”, “Офицеры” ва маса манияр лагьана.

Докъузпара

Усугъчайдал Гъалибвилин паркуна пак сувариз талукьар­навай мярекатар кьиле тухвана.

Суварин парадда Докъузпара райондин адиминистрация­дин кьил Мегьамед Шамилова, Россиядин ФСБ-дин Ахцегьа авай пограничный къуллугъдин векил Сулейман Урдуханова, райондин ветеранрин советдин председатель Мелик Балакъадашева, администрациядин, идарайрин къуллугъчийри ва общественный организацийрин векилри иштиракна.

Мярекатдин иштиракчийри женгера иштиракай ва телеф хьайи районэгьлийрин гьуьрметдай туькIуьрнавай мемориал­дал цуьквер эцигна. Ахпа М.Шамилова районэгьлийриз Гъалибвилин сувар тебрикна. Ада районда амай са ветеран, Къа­лажух хуьряй тир Атамов Межидаз кьилди сувар мубаракна.

Райондин культурадин управленидин къуллугъчийри концертдин еке программа гьазурнавай. Шадвилин мярекатдин эхирдай ашукь Шемшира, Заира ва Роза Чигниевайри, Адем Аликъулиева, Зумрудин Саидова ва масабуру устадвилелди санал “Гъалибвилин Югъ” мани тамамарна.

Белиж

9-Майдиз Белиж поселокда Гъалибвилин 76 йисаз талукьарнавай  сувар  малум тушир аскердин памятникдин вилик шад гьалара къейдна.

Памятник алай майдан кьуд патахъай суварик иштиракиз­ атанвай, гъилера пайдахар, шарар, цуьквер ва плакатар авай саки кьве агъзурдалай виниз инсанрай ацlанвай. Гзафбурун гъилера чпин бубайрин ва ата-бубайрин суьретар авай.

Ана Белиж поселокдин кьил Рамиз Гьабибулаева, Дербент райондин кьилин заместитель Садир Эмиргьамзаева, РД-дин Халкьдин Собранидин депутат Эрик Ибрагьимова, Хизри Абакарован куьмекчи Тебриз Саидова, поселокдин школайрин директорри, Дербент райондин ва поселокдин собранийрин депутатри, поселокдин ва къваларив гвай хуьрерай атанвай агьалийри иштиракна.

Анал Ватандин Чlехи дяведин ветеранриз ва кlватl хьанвайбуруз Р.Гьабибулаева, С.Эмиргьамзаева, Э.Иб­рагьимова, Т.Саидова, поселокдин депутатрин соб­ра­нидин председатель А.Сефербегова Чlехи Гъалибвилин сувар тебрикна.

Мярекатда школайрин художественный самодеятельностдин жаван артистри къалурай концертдин нумрайрилай вири рази яз амукьна. Эхирдай аялри цавуз чпин гъилера авай шарар ахъайна.

«Лезги газет»