Дагъустан Республикадин Кьилин везифаяр вахтуналди тамамарзавай Сергей Меликова Россиядин Игит Зейнудин Батманован уьмуьрдин юлдашдив Каспийск шегьерда эцигнавай цIийи кIвалерай квартирадин куьлегар вахкана. Идакай “Лезги газетдиз” региондин Кьилин пресс-къуллугъди хабар гана.
2015-йисан майдин вацра Кьурагь райондин КIирийрин хуьряй тир мешебеги Батмановаз тама жегьил хизан кьунвай террористар акуна. Ада бандитриз хизан ахъаюнин гьакъиндай малумарна. Амма террористри Батмановавай Кьурагь райондин полициядин отделенидин начальникдиз зенг авун ва адаз тамуз эверун буйругъна. Амма викIегь мешебегиди и буйругъ кьилиз акъуднач. Бандитри адан чандиз къаст авуна. И вакъиайрикайни, хейлин вахт алатайла, гьа бандитрикай сад къайдаяр хуьдай органри кьурла, малум хьана.
“Чна инсанрин гражданвилин игитвилер рикIелай ракъурна виже къведач. Уьлкведин Верховный Главнокомандующий Владимир Владимирович Путина ви уьмуьрдин юлдашдиз Игитвилин тIвар гунин къарар кьабулун лап важиблу ва гьуьрметдин кар я. Гьам Дагъустандин са шумуд несилар патални. Уьмуьрда гьар са вахтунда игитвилиз чка авайди абуру кьатIунна кIанда. Женгинин везифаяр вилик квачирлани, къуьнерал погонар алачирлани, игитвал къалуриз жезвайди я. Ви уьмуьрдин юлдашди, намуслу, къени инсанди, халисан игитвал къалурна, гьавиляй адаз баркалла!” — лагьана, Россиядин Игитдин уьмуьрдин юлдашдихъ элкъвена, Сергей Меликова.
Жамиля Батмановади уьмуьрдин юлдашдин къени крар ва игитвал рикIелай алуд тийизвай республикадин руководстводиз сагърай лагьана. “Чун хьтин инсанриз куьмекзавай квез за, юкь агъузна, икрамзава. Куьне чун патал авунвай кар рикIелай тефидайди я”, — лагьана Игитдин хендедади.
РФ-дин Президент Владимир Путина 2018-йисан 6-майдиз акъудай къарардалди Кьасумхуьруьн лесничестводин мешебеги Зейнудин Батмановаз, вичин чанни къурбандна, жегьил хизан террористрикай къутармишунай Россиядин Игитвилин тIвар гана. Алай вахтунда КьепIиррин участокдин больницада медсестра яз кIвалахзавай адан юлдаш Жамиля Батмановади пуд хцизни са рушаз тербия гузва.
«Лезги газет»
