И йикъара чав чIулав хабар агакьна: яргъалди чIугур залан азардикди тIвар-ван авай публицист, писатель, общественно-политический деятель, вичин ватанэгьлийриз, гьакI вири дагъустанвийризни гьакьван истеклу, хатурлу хьайи инсан — Нариман Гьажиевич Гьажиев (Самуров) — рагьметдиз фена. Ам чидай вирибуру адахъ яс чIугвазва, багърийриз, мукьва-кьилийриз сабурар гузва.
Н.Гь.Гьажиев 1938-йисан 21-октябрдиз Ахцегьа дидедиз хьана. Ина юкьван школа, Ростовда университетдин журналистикадин факультет (1968), Москвада ВПШ акьалтIарна (1974). Гзаф йисара Ахцегьа райондин “ЦIийи дуьнья” ва Махачкъалада “Комсомолец Дагестана” газетрин редакцийра, партиядин Дагъустандин обкомда, Ахцегь райкомдин 1-секретарвиле (1983-1991) кIвалахна.
А йисар Ахцегь ва Докъузпара районрин (а чIавуз саднавай) агьалийри “къизилдинбур” яз гьисабзава. ГьикI хьи, Н.Гь. Гьажиеван регьбервилик кваз и районар экономикадинни культурадин, яшайишдинни асайишдин рекьерай хейлин виликди фена.
Сифте яз Ахцегьа пуд мертебадин 1-нумрадин юкьван школадин, райбольницадин, поликлиникадин дараматар, аялрин бахча, консервийрин завод эцигна. Ленинграддин “Рассвет” фабрикадин филиал, маса карханаяр, цехар арадал гъана, инсанриз кIвалахдай, яшайиш къулайдиз тешкилдай мумкинвилер артухарна.
Докъузпарада “Ахцегь-Мискискар”, “Миграгъ-Мискискар”, “Къуруш-Къаракуьре” къаналар (чебни Н.Гь. Гьажиеван проектрин ва алахъунрин нетижа яз) кардик кутуна, агъзур гектарралди чилер цик кутадай, багъларинни саларин майданар артухардай мумкинвал гана. Докъузпара районда гьатта ЦIийи Къаракуьре хуьр арадал атана!
Н.Гьажиеван — общественно-политический деятелдин кIвалах республикадин гзаф органра давам хьана. 1983-1993-йисара ам ДАССР-дин Верховный Советдин депутат тир. 1990-йисуз Компартиядин XXVIII съезддин делегатвиле хкяна.
Писатель, публицист яз, чи гъилера ада урус чIалал кхьей “Женнетдин ичер”, “Гъетерин югъ”, “Кьакьан ичин тарцик”, “Цавун мискIин — Уьренлер”, “Ахцегьрин къеле”, “Шар-Эли — халкьдин пачагь”, “Низамидин хазина” ва маса ктабар (гьикаяяр, повестар, роман) ама.
Адан зегьмет государстводин чIехи хейлин шабагьралди, гьуьрметдин тIвараралди къейднава. РикIик хъийидай крар мадни гзаф квай. Амма ажалдиз инсаф чидач.
Чна рагьметлудан хизандиз, мукьва-кьилийриз, Ахцегь, Докъузпара районрин вири агьалийриз, дериндай хажалат чIугунивди, башсагълугъвал гузва.
Нариман Гьажиевич Гьажиеван экуь къамат чи рикIелай садрани алатдач.
“Лезги газетдин” редакциядин коллектив
