И йикъара “Мавел” издательстводин типографияда Дагъустандин халкьдин шаир, алай аямдин шииратда вичин жанлу, экуь, метлеблу гел тазвай чIалан устад Майрудин Бабахован эсеррикай ибарат “АнтIалар” тIвар алай кьве томдикай ибарат ктаб акъатнава. КIелзавайбур лап кьитдаказ ишлемишзавай “антIалар” гафунин мана чирунин гуьгъуьна гьат тавун патал баян гузва. “АнтIал” гафуникай сечме, аваран, хкягъай мана хкатзава. Гьа икI, Майрудин Бабаханова кIелзавайбуруз вичин яхцIур йисан яратмишунрин сечме кьилерин бегьер теклифзава.
Сад лагьай томда шиирриз майдан ачухнава. КIелдайбурун вилик жуьреба-жуьре йисара акъатай “Къизилгуьлдин мани”, “Муьгьуьббатдин куьче”, “Гъетери табдач”, “Ракъинин сухта”, “Лекьрен мани” ктабрай хкянавай лап хъсан шиирар гъанва. Абурал алава яз, ктабда эхиримжи йисара теснифнавай цIийи эсерарни гьатнава. Алай девирдин дегишвилериз, тIебиатдинни инсандин алакъайриз, хайи макандин гуьрчегвилиз, инсандин лайихлу ерийриз ва инсанвал квадарзавай синихриз талукь шиирар пара таъсирлубур я. Саки гьар са шиир кIелайла, автордин бажарагъдин, зигьиндин, къанажагъдин, уьмуьр ва дуьнья кьабулзавай, адав эгечIзавай тегьердин кьакьанвал гьиссдай мумкинвал гузва.
Майрудин Бабаханован кьвед лагьай томда шиирралди кхьенвай “Келентар” роман, афоризмаяр ва гьикаятдин эсерар гьатнава. Романда алатай асирдин сиясатдин, жемиятдин рехъ дегиш жезвай макъамда лезги хуьрера арадал атай гьаларикай, инсанрин гьерекатрикай, мурадрикай ва кьилиз фейи, тефей крарикай ихтилатзава. Гьикаятдин эсерра чал гьар юкъуз хуьрерани шегьерра гьалтзавай чи инсанрин ажайиб ва итижлу къаматар, тIебиатдин гуьзел шикилар ганва. Автордин афоризмаяр кIелзавайдаз мадни таъсирдайбур хьанва.
Чна Майрудин Бабахановаз кIелзавайбуруз багъишнавай сечме бегьер — “АнтIалар” ктаб мубаракзава.
Нариман Ибрагьимов
