Пак Рамазандин вацра Махачкъалада, “Мавел” чапханада, лезги чIалал “Исламдин эдебар, ахлакьар ва дуьаяр” тIвар алай ктаб чапдай акъуднава. Адан автор Ахцегь райондин Луткунрин хуьряй тир Амрагьан хва, диндин алим, Дагъустандин имам аш-Шафиидин тIварунихъ галай Исламдин ва Медина шегьерда авай Исламдин международный университетар акьалтIарнавай Ямин гьажи Мегьамедов я. Къейд ийин хьи, ада сифте яз Къуръандин манайрин таржума лезги чIалал акъудна.
Диндин алимдин нубатдин ктабда Исламдин ахлакьрикай, эдебрикай гегьеншдиз раханва, экуьнинни нянин азкаррикай ва истихара дуьадикай малуматар гьатнава. Ктаб лезгийрин Махачкъалада кардик квай марифатдинни медениятдин “Тербия” макандин къаюмвилик кваз акъатнава.
1000 экземпляр аваз акъатнавай и ктаб 110 чиникай ибарат я. Ктаб Махачкъалада “Лезги газетдин” редакциядай маса гузва. Къимет — 100 манат. МискIинриз, медресайриз, диндин маса идарайриз ктаб гьавая гузва. Анрин векилривай ктаб “Лезги газетдин” редакциядай вахчуз жеда.
Играми стхаярни вахар! Вилик Сив хуьнин сувар ква. “Исламдин эдебар, ахлакьар ва дуьаяр” ктаб суварин юкъуз куь мукьва-кьилияр патал вижевай савкьат жеда.
Агьмед Магьмудов
