29-апрелдиз Дагъустандин Кьилин везифаяр вахтуналди тамамарзавай Сергей Меликован тапшуругъдалди Докъузпара райондиз РД-дин Гьукуматдин Председатель Абдулпатагь Амирханов мугьман хьана. Ина ам са шумуд хуьруьз фена, чкадин агьалийрихъ галаз гуьруьшар кьиле тухвана, авай гьаларихъ галаз мукьувай таниш хьана.
Къаракуьре
Сифте нубатда Абдулпатагь Амирханов Къаракуьредин юкьван мектебдиз рекье гьатна. Ам 1926-йисуз эцигнавайди я. Алай вахтунда ина 75 аялди кIелзава. Дараматдиз килигайдалай кьулухъ республикадин Премьер-министрди хуьре цIийи мектеб (кIелдай 100 чка авай) эцигунин игьтияж авайди къейдна.
А. Амирханова са жерге министерствойринни ведомствойрин векилрихъ, чкадин агьалийрихъ галаз цIийи мектеб эцигдай чкадин патахъай меслятарна. Теклифар гьар жуьрединбур хьана. Нетижада вири агьалияр патал къулай чка хуьруьн центрада авай мулк тирди тайинарна, гьанал эцигдайвал хьана. Гьукуматдин Председателди гъиле-гъилди РД-дин образованидин ва илимдин, экономикадинни мулкар вилик тухунин рекьяй министерствойрал талукь программадин сергьятра аваз мектебдин дарамат эцигдай пулдин такьатар чара авунин месэла гьялун тапшурмишна.
Усугъчай
Гуьгъуьнлай Абдулпатагь Амирханов Усугъчай хуьре авай Докъузпара райондин кьилин духтурханадиз фена. Инаг кьве корпусдикай ибарат я. Сад лагьайди 1936-йисуз эцигнава, кьвед лагьайди 1990-йисуз ишлемишиз вахкана. Кьвед лагьай корпус авай гьалди медицинадин рекьяй куьмек гунин, цIаяр кьунин хатасузвилин вири истемишунриз жаваб гузвач.
Духтурханада тади куьмекдин 6 улакь ава, медицинадин тадаракар лагьайтIа, куьгьнебур я. Кьве корпус алай мулкунал эцигна куьтягь тавунвай объект ала. 2008-йисуз махсус программадин сергьятра аваз ина 50 койка авай духтурхана, вишев агакьна азарлуяр кьабулдай поликлиника ва инфекцийрин 8 койка авай корпус эцигиз гатIунна. 2008-2013-йисара эцигунрин кIвалахриз 19 миллион манат пул чара авуна, амма 2014-йисалай кIвалахар акьалтIарун патал пулдин такьатар чара хъувунач.
Медидарадин коллективдихъ галаз рахайдалай кьулухъ Абдулпатагь Амирханова цIийи духтурхана эцигна акьалтIарун патал РД-дин гьукуматди вири къуватар желбдайдакай лагьана. Алай йисуз и кIвалахриз 10 миллион манат пул ахъайнава.
Усугъчайдал гьакIни кIелдай 320 чка авай цIийи мектеб эцигунни фикирдиз къачунва.
Къуруш
Европада виридалайни кьакьанда авай хуьрени аялри 1926-йисуз эцигнавай мектебда чирвилер къачузва. Дараматдин цларай ферер атанва. Исятда ина 64 аялди кIелзава.
Мектеб авай гьаларихъ галаз таниш хьайидалай кьулухъ Абдулпатагь Амирханова талукь министерствойрал Къурушдал кIелдай 80 чка авай цIийи мектеб эцигунин месэла веревирд авун тапшурмишна.
Гуьгъуьнлай меркездай атанвай мугьманар Ярудагъдин ценерив гвай альпинистрин лагердиз рекье гьатна. Дагъустандин альпинизмдин Федерациядин председатель Петр Леонова хабар гайивал, лагерь эцигиз 2015-йисуз гатIунна. Республикадин Премьер-министрди лагерь алай мулкар мадни авадан авун патал жавабдар ксариз са жерге тапшуругъар гана.
2023-йисалди — 800 миллион манат
Гуьгъуьнлай Абдулпатагь Амирханов Докъузпара райондин яшайишдин метлеб авай са шумуд объектдал фена. Абур авай гьаларихъ галаз таниш хьайидалай кьулухъ РД-дин Гьукуматдин Председателди бязи объектар цIийикIа туьхкIуьрун герек тирдакай лагьана. Ихтилат “Мегьарамдхуьр-Ахцегь-Рутул” рехъ ремонт авуникай, Усугъчайдал алай цин имаратар (водозаборные сооружения) дегишаруникай, са шумуд хуьр целди таъминардай цIийи турбаяр тухуникай, Миграгъа цIийи мектеб эцигуникай, Демирхуьруьн цIилинин муьгъ цIийикIа туьхкIуьр хъувуникай физва. ТIварар кьунвай объектар патал гуьгъуьнин йисара талукь программайрин сергьятра аваз пулдин такьатар чара ийида.
Къейд ийин хьи, Докъузпара район вилик тухун патал алай йисуз республикадин инвестицийрин программадин ва региондин са жерге проектрин сергьятра аваз 230 миллион манат пул чара авунва. 2023-йисалди муниципалитет вилик тухун патал, санлай къачурла, 800 миллиондив агакьна пулдин такьатар ахъайда.
Абдулпатагь Амирханов кьиле аваз Докъузпара райондиз мугьман хьайи делегациядик РД-дин Кьилин ва Гьукуматдин Администрациядин Руководителдин заместитель Арслан Сайпуллаев, РД-дин экономикадин ва мулкар вилик тухунин министр Руслан Алиев, РД-дин образованидин ва илимдин министрдин везифаяр вахтуналди тамамарзавай Яхья Бучаев, РД-дин эцигунрин министр Артур Сулейманов, РД-дин туризмдин ва НХП-дин министрдин везифаяр вахтуналди тамамарзавай Эмин Мерданов ва масабур квай.
Агьмед Магьмудов
