19-февралдиз Дагъустандин Кьилин везифаяр вахтуналди тамамарзавай Владимир Васильев Къизлярдиз атана. Адахъ РД-дин Халкьдин Собранидин Председатель Хизри Шихсаидов, Дагъустандин муфтий Агьмад-гьажи Абдулаев, Махачкъаладин ва Грозныйдин архиепископ Варлаам, республикадин чувудрин общинайрин председатель Валерий Дибияев ва маса ксар галай.
Къизлярдин, Къизляр ва Тарумовка районрин кьилерихъ галаз гуьруьшмиш хьайидалай гуьгъуьниз Владимир Васильев 18-февралдиз вяздиз атайбур гуьллеламишай Георгий Победоносецдин ибадатханадиз фена ва мусибат арадал атай чкадал цуьквер эцигна.
Ада къейдна хьи, гзаф миллетрин ва гзаф динрин халкь пайи-паяр ийиз кIан хьайидалай и кар алакьнач: “Чун мадни гзаф сад я, чун Дагъустан вилик финал пехилвалзавай душманрин макьсад гьихьтинди ятIа гъавурда ава, абуруз жуьреба-жуьре рекьералди гзаф миллетрин обществода сад-садал гьалдариз кIанзава. Амма абурулай и кар алакьдач”, — малумарна Владимир Васильева.
Телеф хьайибурун багърийриз, мукьвабуруз ва вири дагъустанвийриз башсагълугъвилин гафар Дагъустандин муфтийдини лагьана. “Дагъустан сад я, ина пайи-паярдай са шейни авач”, — лагьана ада. Ахпа Владимир Васильев Федеральный медико-биологический агентстводин руководитель Владимир Уйбыдихъ ва РД-дин здравоохраненидин министр Танка Ибрагьимовадихъ галаз Къизлярда авай Георгий Победоносецдин ибадатханадин патав яракьлу бандитди гуьлле гунин нетижада хирер хьайибурун патав фена.
Танка Ибрагьимова малумарайвал, хирер хьанвайбуруз медицинадин рекьяй чарасуз сифтегьан куьмекар вахтунда гана, абурукай хирер хьанвай сад Федеральный медико-биологический агентстводин самолетда аваз Москвадиз агакьарна.
Ахпа Владимир Васильева совещание кьиле тухвана. Ам, са тахсирни квачиз телеф хьайибур рикIел хкун яз, са декьикьада кисна акъвазунилай башламиш хьана. КIватI хьанвайбурун вилик экъечIна рахадайла, республикадин Кьили инсанар телеф хьун залан магьрумвал я лагьана.
“Гьелбетда ихьтин жуьредин гьерекатар диндин ва миллетрин лишанриз килигна такIанвилихъ, кьисас вахчунихъ элкъуьрнавайбур я. Амма и крари са нетижани гудач, эгер чун вири и кардиз акси акъвазайтIа”, — лагьана кIватI хьанвайбурун вилик Владимир Васильева. Гьа са вахтунда ада инсанрихъ галаз кIвалах тухунизни гзаф фикир гуниз эвер гана. Сифтени-сифте и кар кьиле тухун патал общественный тешкилатар желб авун лазим я.
РД-дин Кьилин везифаяр вахтуналди тамамарзавай В.Васильева къейд авурвал, и мусибатди Россияда са касни къайгъусуздаказ тунвач. “…СКФО-да РФ-дин Президентдин тамам ихтиярар авай Векил Олег Белавенцева телеф хьайибурун мукьва-кьилийриз ва багърийриз башсагълугъвал гана ва вич куьмек гуз гьазур тирди лагьана.
Башсагълугъвилер гьакIни Москвадин ва вири Урусатдин Патриарх Кириллалай, Россиядин муфтийрин Советдин Председатель шейх Равиль Гайнутдиналайни атана. Вири регионри башсагълугъвилер гузва, и четин декьикьада чун санал ала. И жуьреда тереф хуьн чун патал, гьелбетда, лап важиблу я”.
Идалайни гъейри, Владимир Васильева хирер хьанвайбуруз куьмекун патал авунвай кIвалахдизни рази жедай къимет гана. Адан гафаралди, и кар вини дережада аваз тешкилна. Хирер хьанвайбур сагъ хъжезва. Къайдаяр хуьдайбуруни чпин буржи кьилиз акъудна, террорист тергна. Реанимацияда авайбурун гьал дурумлудаказ заланди я. Кешишдини вич викIегьдиз тухвана: тахсиркарди инсанриз гуьлле гудайла, ам ибадатханадихъ атана, рекье гьатна, ракIарар кIевирнавай. Гьа идалди ибадатханади къанлудикай инсанар хвена.
Гуьруьш кьиле фидай вахтунда РД-дин Халкьдин Собранидин Председатель Хизри Шихсаидова, телеф ва хирер хьайибурун хизанриз башсагълугъвал гуналди, сад хьуниз эвер гана.
“…Халкьарин арада душманвилик цIай кутаз са чIавузни жедач, гьикI хьи, Дагъустан гьамиша сад ва битав я. Чна миллетар чара авуниз рехъ гудач. Чна и кардикай нетижа хкудна, ихьтин крар мад тикрар тахъхьун патал вири жуьредин серенжемар кьабулна кIанда, гьакIни хасаратвал хьанвайбуруз куьмек гун яз чна чи садвал къалурун лазим я”, — лагьана Х.Шихсаидова.
Чи мухбир
