Эхиримжи йисара Мегьарамдхуьруьн районда багъманчивилин хиле са жерге чIехи проектар кьилиз акъудзава. Инвестицийрин нубатдин проектдин сергьятра аваз ина Дагъустанда виридалайни чIехиди тир емишар хуьдай гьамбархана эцигзава. Идакай чаз райондин информациядин къуллугъди хабар гузва.
“Мегьарамдхуьр” СпоК-ди санлай 1450 тонн емишар хуьдай гьамбархана эцигунин кIвалахар кьиле тухузва. Проектдин къимет 50 миллиард манатдилай гзаф я. Ам РД-дин хуьруьн майишатдин ва недай суьрсетдин министерстводин рекьяй агакьнавай государстводин куьмекдалди кьилиз акъудзава — 2020-йисуз материалринни техникадин база артухарун патал муьштерийрин кооперативдиз 31,2 миллион манатдин кьадарда аваз грант чара авунва.
Инвестицийрин майдандал фундамент эцигунин, бетондин майданда къир цунин ва ракь ишлемишна гьазурзавай даяхар туькIуьрунин кIвалахар кьилиз акъудна куьтягьнава. Эцигунрин кIвалахар алай йисан пуд лагьай кварталда тамамдаказ кьилиз акъудун планламишнава.
Кооперативди гьакIни 12,5 гектар чилел лап фад арадал къведай ва булдаказ бегьер гъидай жуьредин багъ кутунин проектни кьилиз акъудзава. Алай вахтунда ина “Моди” ва “Вильямс прайд” сортарин ичерин 22 агъзур къелем цанва, насосрин цIийи станция эцигнава ва яд хуьдай чка туькIуьрнава. Ина стIал-стIал яд гудай къайда ишлемишда.
«Лезги газет»
