ДГПУ-дин къецепатан чIаларин факультетдин 4-курсунин студентка, бине Хив райондин АрхитIрин хуьряй тир Етара Мирзаханова уьлкведин дережада аваз кьиле фидай пешекарвилин “Учитель будущего. Студенты” конкурсдин финалдиз акъатнавайдакай чна виликдай хабар ганай (килиг: 2021-йисан 13-нумра). РикIел хкин, и конкурсда СКФО-дай — 26 касди, Дагъустандай лагьайтIа, тек са Етара Мирзахановади иштиракна.
Финалдин мярекат Сочи шегьерда авай образованидин “Сириус” центрада кьиле фена. Санлай къачурла, ана уьлкведин 47 региондай 152 студентди иштиракна. Илимдинни чирвилерин акъажунрин нетижада чи кьегьал руша Вирироссиядин конкурсда гъалибвал къачуна. Чна адаз и чIехи агалкьун ри-кIин сидкьидай мубаракзава.
“Учитель будущего. Студенты” проектдин сергьятра аваз Росмолодеждин грантрин конкурсни кьиле фена. Конкурсдиз вуганвай проектрикай жюриди виридалайни хъсан кIуьд хкяна. Абурун арада Етара Мирзахановадин “Языковой лагерь “Mointain Camp” тIвар алай проектни авай. Ам кьилиз акъудун патал архитIви рушаз 483 агъзурни 400 манат пул ганва. Эгер Е.Мирзахановадин проектдикай куьрелди лагьайтIа, ам Дагъустандай ва Чечнядай тир ингилис чIал чириз кIанзавай аялар кьабулдай лагерь арадал гъуникай ибарат я.
Агьмед Магьмудов
