Дагъустандин Кьилин везифаяр вахтуналди тамамарзавай Сергей Меликов Кьиблепатан Дагъустандиз фини адаз ана авай гьаларихъ галаз мукьувай таниш жедай мумкинвал гана. Эгер икьван чIавалди республикадин регьбердиз тайин са шегьерда, районда гьаларикай чиновникри гузвай малуматрай хабар жезвайтIа, гила чкайрал кьиле физвай гьерекатар адаз вичин вилералди акуна.
Сергей Меликов Дербент ва Дагъустандин Огни шегьерриз, Дербент, Табасаран, Хив, Сулейман-Стальский, Агъул, Мегьарамдхуьруьн, Докъузпара, Ахцегь районриз мугьман хьана. И вакъиа республикадин Кьилин кIвалахда цIийи къайда хьиз кьабулиз жеда. ГьикI лагьайтIа, виликдай хьайи кьилери чпин кIвалахда ихьтин къайдайрикай менфят къачунач. Сергей Меликова, Дагъустандин Кьилин къуллугъдал тайинарайла, вич халкьдинни гьукумдин арада авай алакъаяр мадни мягькемариз алахъда лагьана гаф ганай. Кьиблепатан Дагъустандин шегьерризни районриз фини ада гайи гаф кьилиз акъудзавайди къалурзава.
Малум тирвал, Сергей Меликов республикадин амай муниципалитетризни фидайвал я. Ада региондин жуьреба-жуьре пипIера авай гьалар ахтармишзава, абуруз къимет гузва, нетижаяр кьазва. КIвалахдив ихьтин къайдада эгечIуни Дагъустандин Кьилиз ва ада арадал гъанвай дестедиз халкьдин патай ихтибар артухарзава.
Ильман Алипулатов,
РД-дин Общественный палатадин
комиссиядин председатель
