И йикъара Махачкъалада кардик квай “Лотос” чапханада лезги чIалал “100 тапшуругъ” тIвар алай ктаб чапдай акъатна. Адан авторар “Лезги газетдин” кьилин редактор Мегьамед Ибрагьимов ва адан заместитель Куругъли Ферзалиев я.
Ктабдикай гьам аялривай, гьам чIехибурувайни менфят къачуз жеда. Ада зигьин хци авуниз, чIал гегьеншаруниз, чирвилер артухаруниз куьмек гуда. Кьилди къачуртIа, ана тIебиатдикай, гьайванрикай, къушарикай, набататрикай, гьашаратрикай, емишрикай, майвайрикай ва хейлин маса затIарикай хайи чIалал малуматар ава.
Рангарин шикилралди чIагурнавай, итижлу тапшуругъар авай ктаб ФГОС-дин истемишунрив кьадайвал гьазурнава. Тапшуругърин жавабар ктабдин къене кхьида, яни ада дафтардин везифани кьилиз акъудда. И жуьредин пособияр чахъ авач, гьавиляй ктабдикай-дафтардикай сифтегьан классра тарсар гузвай муаллимризни куьмек жеда.
Къейд ийин, Дагъустандилай къеце яшамиш жезвай хейлин лезгийри чпин аялриз хайи чIал чирун патал талукь ктабар жагъизвач лугьуз, чи редакциядиз чарар кхьизва, зенгер ийизва. Чна фикирзавайвал, “100 тапшуругъ” ктаб акъатун и нукьсан арадай акъудунин сифте камарикай сад я.
Ктабдин къимет 200 манат я. Маса къачуз кIанзавайбур патал телефондин нумраяр: 8-928-584-16-72; 8-928-560-26-17 (WhatsApp).
«Лезги газет»
