15-апрелдиз ДГТУ-дин дараматда алатай йисан кIвалахдиз талукь яз тухвай “СКФО-дин эцигунардайбурун Гильдия” СРО-ди собрание и хиле тафаватлу хьайи виридалайни хъсан эцигунардайбуруз шабагьар, пишкешар гунилай башламишна.
Шад жедай кар ам я хьи, чпин кIвалахдиз виниз тир къимет гайи юлдашрин арада чи ватанэгьли, тежрибалу инженер-эцигунардайди, «Империал Строй» ООО-дин генеральный директордин заместитель Рамазан Рамазановни авай. Адан зегьмет Россиядин эцигунардайбурун союздин “Эцигунрин хиле лайихлувилерай” ордендалди къейднава.
Рамазан Назирович Рамазанов Кьурагь райондин Урсунрин хуьре 1961-йисан 17-апрелдиз дидедиз хьана. Юкьван школа ада Тарумовский райондин Калиновка хуьре куьтягьна. Идалай гуьгъуьниз Р.Рамазанова Бакудин мореходный училище акьалтIарна ва штурманвилин кеспи къачуна. Армияда кьве йисуз Дальний Востокда къуллугъ авурдалай гуьгъуьниз ада Новочеркасскдин Яру Пайдах авай политехнический институтдин гражданвилин эцигунрин факультет акьалтIарна. 1989-йисуз жегьил инженердиз-эцигунардайдаз кIвалахиз Новочеркасскдин “Южтрубстрой” карханадиз теклифна. Са куьруь вахтундилай ада “Миннефтьгазстрой” карханада эцигунрин мастер яз кIвалахна. Кьве йисалай ам эцигунрин участокдин начальниквиле тайинарна. И йисара ада яшайишдин кIвалер, нафтIадихъ, газдихъ галаз алакъалу карханаяр эцигунин карда иштиракна.
2012-йисалай Р.Рамазанова Каспийск шегьерда авай «Империал Строй» ООО-дин гендиректордин заместителдин везифаяр тамамарзава.
Уьмуьрдин юлдаш Фарида Бейбалаевнадихъ галаз санал хизанда хва Раджи тербияламишна.
Чна Рамазан Назировичаз шабагь мубаракзава ва кIвалахда агалкьунар, юлдашрин арада гьуьрмет мадни артух хьун алхишзава!
«Лезги газет»
