И йикъара Краснодардин крайдин Голубицкая станицада 13-14 йисара авай жегьилрин арада боксдай Россиядин профсоюзрин ЦС-дин кIвенкIвечивал патал Вирироссиядин турнир кьиле фена. РД-дин команда гваз ана Кьасумхуьруьн 1-нумрадин ДЮСШ-дин КIварчагърин хуьре Гьабиб Аллагьвердиеван тIварунихъ галай бокс вилик тухунин центрада тренер-муаллимвиле кIвалахзавай Альберт Межидовани иштиракна.
— И турнирда Россиядин жуьреба-жуьре субъектрай тир 215 жаванди иштиракна, — лагьана А.Межидова. — Ам 5 юкъуз давам хьана. Дагъустандин командадик жаван 6 боксер квай. Чи вири спортсменри турнирда 1, 2 ва 3-чкаяр кьун шад жедай кар я. Турнирда КIварчагъай тир 2 спортсмендини иштиракна. Артем Агъамегьамедова — 2, Агьмедагъа Шамсудинова 3-чкаяр кьуна. Гъалибчийриз ва призерриз медалар, дипломар гана.
Краснодардин крайда тухвай турнирда гъалибвал къачур жаван боксерри гила Россиядин кIвенкIвечивал патал кьиле фидай акъажунра иштиракда.
Хазран Кьасумов
