Малум тирвал, 18 — март РФ-дин Президент хкягъунин сечкийрин югъ я. Исятда президентвиле кандидатри сечкичийрин арада таблигьат тухунин кIвалах къизгъин хьанва. Абуру, чкайрал жемятдихъ галаз гуьруьш жез, абур гъавурдик кутазва. Ингье, 26-февралдиз Владимир Владимирович Путинан ихтибарлу кас, экономикадин илимрин доктор, Дагтехуниверситетдин проректор Елена Павлюченко ва РД-дин дишегьлийрин Союздин председатель Интизар Мамукаева Ахцегь РДК-дин залда чечкичийрихъ галаз гуьруьш хьана.
Мярекат, мугьманар тебрикунин ва уьлкведин Президент хкягъун хьтин важиблу вакъиадин метлебдикай суьгьбетуналди, Ахцегь муниципалитетдин кьилин заместитель Алмас Шуаева ачухна. «Президентдин сечкийриз гьазурвал акун яз, районда ТИК кардик ква, сечкийрин 31участок ва гьакьванни комиссияр тешкилнава, районэгьли 18047 кас сечкичийриз (алава аз, гьеле сергьятчиярни ава) чпин гражданвилин буржи тамардай къулай шартIар яратмишзава…»,- килимайрилай кьулухъ ада трибунадихъ Интизар Эседуллаевнадиз теклифна.
— Къе залдин чIехи пай дишегьлияр кIватI хьунал зун пара рази я, вучиз лагьайтIа кIвал-къул, гьатта республикада гьуьрметлу гьалар, къулайвал хуьзвайдини дишегьлияр я лагьайтIа ягъалмиш жедач. Гьагьиф хьи, 1991-йисуз СССР-дихъ галаз Женсоветарни чкIана. Общественный и тешкилатдин важиблувал чиз, чи зурба шаир ва общественный деятель Фазу Алиевади ам цIийи кьилелай РД-дин дишегьлийрин Союз тIвар алаз арадал хкана, адан кьиле акъвазна. Фазу Алиева рагьметдиз фейидалй кьулухъ эстафена зал гьалтнава. Алай вахтунда чи Союздиз вичин кьилин везифа хизандихъ галаз кIвалахуна аквазва, гьикI хьи веледар ватанперес, зегьметкеш инсанар яз тербияламишун диде-бубадин жавабдарвилелай аслу я. Гьихьтин четин гьалара гьатайтIани, чпин намус-гъейрат, инсанвал, хайи Ватан хуьн дагъвийрин ивида, бубайрин адетра ава. РикIел хкин, Чечнядай 400-лай артух яракьламиш бандитар сухулламиш хьайи акьалтIай четин 1999-йис. Уьлкведин ФСБ-дин директор Сергей Степашина а чIавуз «Мы Дагестан потеряли» лагьанай. Гуьгъуьнай Владимир Путин атана, ада дагъустанвийриз ихтибарна, вири крар къайдада хутуна. Ам хьаначиртIа, чидач чи гьалар гьи патахъ дегиш жедайтIа. За, эвелимжи нубатда, Ахцегь райондин дишегьлийриз 18-мартдиз вири сад хьиз атана, Путиназ сесер гуниз эверзава…
— Гьуьрметлу районэгьлияр!- гаф къачуна Прпезидентвиле кандидат Владимир Путинан ихтибарлу кас тир Елена Ивановнади. — Гьелбетда, чаз садазни чи аялрин, Ватандин кьадар-кьисмет, гележег къайгъусуз туш. Вучиз чна квез В.Путиназ сесер це лугьузва? Алай вахтунда дуьньяда арадал атанвай муракаб гьалара США-дин вагьши сиясатдин, халкьарин арадин терроризмдинни экстремизмдин, чи уьлкведа къадагъа тир ИГИЛ-дин хура анжах Владимир Путин хьтин вири рекьерай бажарагълу, гъавурдик квай зурба регьбердивай акъвазиз жеда. Гьавиляй ам Америкадин ва Рагъакидайпатан уьлквейрин кьилевайбуруз дакIан я. Гужлу Президентдин куьмекдалди эхиримжи йисара гужлу Россия арадал хквезвайдан чун вири шагьидар я. Гьакъикъатда чна уькведин Президент ваъ, чи гележег хкязава. Ахцегьвияр гъавурдик квай камаллу халкь я. Гьавиляй за умудзава хьи, сечкийрин юкъуз куьне, вирида сад хьиз атана, ягъалмиш тахьана, Путиназ сесер гуда.
— Эхь, чун дуьньяда парабуруз кIандач, гьатта олимпиадада уьлкведин пайдах хкажизни тазвач, вучиз? – вичиз хас итижлу тегьерда башламишна рахун зегьметдин ветеран Къардаш Мамалиева. — Вучиз лагьайтIа, чаз чун кIан туш, чна чаз гьуьрметзавач. Къайгъусуз, темпел хьанва, зегьмет алачир девлетрихъ галтугнава… Дуьньяда виридалайни пара чилер, девлетар гваз (гьа и кардал абур чал амайбур пехил я), чун лайих тирвал яшамиш жезвач. Гьиниз фена Советрин девирдин чи девлетар – заводарни общественный зурба майишатар? Кьилди ксари хаинвилелди тарашна, вара-зара авуна. Къе телевизордай, месела, Германиядани Израилда чи аял операция авун патал халкьдивай пул кIватиз акурла, заз регъуь жезва. Чи Президент В.В.Путин и татугайвилер алудиз алахънава ва аквадай хьтин агалкьунарни ава: цIийи заводарни фабрикаяр, шахтаярни хуьруьн майишатдин карханаяр арадал хквезва, Ватан хуьнин, гьакI маса месэлайриз кьетIен фикир гузва. И дегишвилер таквазвай кас буьркьуди я. Майдандиз экъечIнавай муькуь кандидатрив гекъигай, шак авач, Путин абурулай виридалайни лайихлу я, гьадаз чна сесер гуда. Анжах са теклиф ава: медицинадин вузриз хьайитIани лап хъсан кIелнавай бажарагълу жегьилар кьабулрай.
РФ-дин Президентвиле кандидат Владимир Путинан тереф хуьзвай хуш келимаяр гьакI райондин Общественный Палатадин председатель Али Исмаилова, муаллимвилин зегьметдин ветеран Жонрид Дагъларова ва масабуру лагьана.
Эхирдай гуьруьшдин тешкилатчи Алмас Шуаева кIватI хьанвайбурун патай мугьманриз сагърай малумарна ва 18-мартдиз районэгьлийрин чIехи паюни В.В.Путиназ сесер гудайди къейдна.
Дашдемир Шерифалиев
