Мукьвара Избербашда пауэрлифтингдай Дагъустандин чемпионат кьиле фена. Ана 8 командадик кваз 100-лай виниз спортсменри чпин устадвал къалурна. Докъузпара райондин пресс-къуллугъдай хабар гайивал, акъажунра виридалайни кьакьан хуьр тир Къурушдал тренер Фейруз Къулиеван гъилик вердишвилер къачузвай 7 спортсмендикай ибарат тир райондин хкянавай командадини иштиракна. Хъсан нетижаяр къалурай ам командайрин арада 3-чкадиз лайихлу хьана…
Ф.Къулиеван агалкьунрикай чна газетда виликрайни, ам залан атлетикадал машгъул жезвай вахтарани, са шумудра кхьейди я. Спортдин мастер, Дагъустандин чемпион тир ада, къаткана штанга хкажунин ва къуватдин троеборьедай са шумудра республикадин рекордарни эцигнай. Алай вахтунда Ф.Къулиева Къурушдал тренер ва жаванрин насигьатчи яз зегьмет чIугвазва. Адан гъилик вердишвилер къачур гзаф спортсменрихъ идалай виликни еке агалкьунар хьана, инлай кьулухъни хьуник умуд кутазва. Дагъдин хуьре акьалтзавай несилдиз спортдин сирер чирунихъ, дуьз рекье тунихъ, абурун дустни жез алакьунихъ къенин юкъуз тIимил важиблувал авач. Фейруз Къулиев сагълам уьмуьр кьиле тухуниз эвер гузвай спортдин хейлин серенжемрин тешкилатчини я. Сагърай вич!
ИкI, Дагъустандин чемпионатда Къурушрин хкянавай командадик квай Мейлан Баширов (59 кг-дал къведалди заланвал авайбурун арада, вири санлай 302,5 кг хкажна) 1-чадиз лайихлу хьана. Альберт Сеферова (59 кг-дал къведалди заланвал авайбурун арада, вири санлай 235 кг хкажна) ва Низами Къулиева (66 кг-дал къведалди заланвал авайбурун арада) 2-чкаяр кьуна. Идалди Н.Къулиева спортдин мастервиле кандидатвилин норма (32,5 кг-дин артухни алаз хкажуналди) тамамарна (вири санлай 457,5 кг хкажна). 74 кг-дал къведалди заланвал авайбурун арада Тамерлан Къулиева (вири санлай 452,5 кг хкажна) ва Ровшан Кишиева (вири санлай 320 кг хкажна) 3-чкаяр кьуна. Дагъустандин чемпионатда Надир Сеферова ва Даниял Асваровани (66 кг-дал къведалди заланвал авайбурун арада) чпин устадвал къалурна ва агалкьунралди нормативарни тамамарна.
Дагъустандин чемпионатда устадвал къалурай гадайри республикадин дережадин акъажунра иштиракнавай им сад лагьай сефер я. Амма абуру чпик еке умудар кутаз жедайди субутна.
Ф.Къулиева ва адан командади чпиз Дагъустандин чемпионатда иштиракдай мумкинвал гунай Докъузпара райондин муниципалитетдин кьил М.Шамиловаз сагърай лугьузва.
Рагнеда Рамалданова
