Хаталувилер алудна
Терроризмдиз акси милли комитетди хабар гузвайвал, 2020-йисуз Россияда 44 терактдин вилик пад кьуна. И делилар ТАСС-ди раижнава.
Мумкин тир терактар виликамаз хатасуз авунин серенжемрин вахтунда 800 тахсиркар эглешарна. Къайдаяр хуьдай органрин къуллугъчийри чинебадаказ террориствилин кIвалахар тухузвай 71 кIеретIдин вилик пад кьуна. Идалайни гъейри, терроризмдихъ галаз алакъалу къанунсуз 66 агъзур материал интернетдин майданрай тергна.
Гъалиб хьайи юкъуз кьена
Нубатдин сеферда сечкийра гъалиб хьайи Чаддин президент гьа юкъуз кьена. Идакай”Новости” РИА-ди хабар гузва.
Къейдзавайвал, 20-апрелдиз сиясатчи ругуд лагьай сеферда президентвиле хкяна. Къанни цIуд йисалайни гзаф девирда ам уьлкведин кьиле акъвазна. Бунтчийрин винел къачур нубатдин гъалибвал шад гьалара къейд авун патал ам военный гьерекатар кьиле физвай зонадиз фена. Амма бунтчийри гьукуматдин кьушунрал гьужум авунин нетижада Дебидал хер хьана. Гуьгъуьнлай ада азарханада чан гана.
Жаваб гуда
Уьлквейрин арада алакъаяр чIурунихъ элкъуьрнавай Чехиядин гьерекатриз Россияди талукь тирвал жаваб гуда. Идан гьакъиндай Россиядин МИД-дин векил М.Захаровади РБК телеканалдин эфирда малумарна.
И йикъара Чехиядин МИД-дин кьилин везифаяр вахтуналди тамамарзавай сад лагьай вице-премьер Ян Гамачека уьлкведа авай Россиядин вири дипломатар рахкурунин фикир малумарнай. Гуьгъуьнлай, Россиядин махсус къуллугъриз чинеба кIвалахзава лагьана гимандик кутуна, 18 дипломат уьлкведай ахкъудна. Чехиядин терефди къачур и “камуниз” жаваб яз, Россиядини а уьлкведин 20 дипломат чпин ватандиз “рекье хтуна”.
РФ-дин МИД-дин векилди къейд авурвал, Чехияди алакъаяр къайи авунин гьикьван серенжемар кьилиз акъудайтIа, абурув гьакьван жавабарни агакьда. М.Захаровади алава хъувурвал, идан патахъай Прагадин тереф бейхабар туш.
Адан гафаралди, Москвадай Чехиядин дипломатар акъудун — им абурун гьерекатриз кутугай жаваб я. “Чехиядин гьерекатриз завай душманвилинбур я лугьуз жеда”, — къейдна ада.
Парабур акси я
Украинадин чIехи пай ватандашриз В.Зеленскийди президентдин сечкийра кьвед лагьай сеферда иштирак хъувуна кIанзавач. SOCIS тешкилатди кьиле тухвай хабарар кьунин серенжемдин нетижаяр “ObozrevateI” чешмеди раижнава.
2024-йисуз кьиле фидай сечкийра Зеленскийди иштиракунин тереф хуьдани лагьана хабар кьурла, украинвийрикай 52,1 процентди наразивал къалурна, 26,2 процентди адан тереф хуьзва, 15,9 процентдин фикирдалди, сечкийрикай гьелелиг рахун ва веревирдер авун фад я.
Агьалийрин 57,1 процентди гьисабзавайвал, Зеленскийди президентдин къуллугъдал пешекарсузвилелди кIвалахзава. Идалайни гъейри, ватандашрин 46,9 процентди малумарайвал, Зеленскийди сечкийрилай вилик хиве кьур крар кьилиз акъуднач.
Маса къачуз кIанзава
Туьркиядин МИД-дин кьил М.Чавушогълуди малумарайвал, уьлкведи Россиядин цIийи С-400 ракетайрин комплексар маса къачун патал рахунар кьиле тухузва, хабар гузва “Новости” РИА-ди.
Идалай вилик США-дин госсекретарь Э.Блинкена Туьркиядин МИД-дин кьилиз Россиядивай С-400 комплексар маса къачун тавуниз эвер ганай. Вичин нубатда Чавушогълуди С-400 маса къачунин “месэла гьялна акьалтIнава” лагьана жаваб ганай.
Трампан къаст
США-дин виликан президент Д.Трампа президент хкягъунин нубатдин сечкийра иштиракун патал вич гьазур тирди “Fox News” чешмедиз ихтилатна. Президентдин тахт патал кьиле фидай акъажунра вичин мумкинвилер гьихьтинбур яз аквазва лагьана хабар кьурла, Трампа гьелелиг и суалдиз жаваб гун фад яз гьисабна. Гьа са вахтунда ада къейд авурвал, 75 миллиондилай гзаф ватандашри адан тереф хуьзва. “Нубатдин президентдин сечкийра иштиракунин къаст за рикIивайни вилик эцигзава”, — алава хъувуна ада.
Чантада хъиткьинна
Китайдин агьалидин чантада авай “Samsung” телефон хъиткьинна. Идакай “GizChina” чешмеди хабар гузва.
Чжэнчжоу шегьерда арадал атай агьвалат видеогуьзчивал тухузвай камерадиз акъатна. Анай аквазвайвал, улакьар акъвазарнавай чкадал къекъвезвай итимдин гъвечIи чантадай садлагьана цIай ва гум акъатна. Парталрини цIай кьуникди адан хамунизни, чIараризни зарар хьана. Шагьидри тестикьарзавайвал, хъиткьинайди 2016-йисуз акъуднавай “Samsung GaIaxy J5 Prime” смартфон я. Телефон аккумулятордиз зарар хьанвайвиляй хъиткьиннаваз хьун мумкин яз гьисабзава.
Хасарат хьанвай касди талукь арза кхьейтIа, “Samsung” тешкилатдин пешекарар арадал атанвай агьвалат ахтармишиз гьазур я.
«Лезги газет»
