Кьилин редактордин гаф
Мукьвара Махачкъала ва Каспийск шегьеррин арада эцигзавай Иса пайгъамбардин (алейгьи ссалам) тIварунихъ галай руьгьдинни марифатдин макандин (Духовно-просветительский центр) чIехи дараматда лезги халкьдин межлис кьиле фена. И вакъиадикай кхьенвай “Халкь агудай мярекат” тIвар алай макъала “Лезги газетдин” 14-нумрадиз акъатнава.
Гьакъикъатдани, им республикадин ва адалай къецепата яшамиш жезвай хейлин ватанэгьлияр сад авур, агудай мярекат хьана. Дагъустандин Муфтиятдин делилралди, межлисда вад агъзурдалай виниз инсанри иштиракна.
Мярекатдилай гуьгъуьниз интернетдин жуьреба-жуьре сайтра адакай чпин фикирар лагьайбурни тIимил хьанач. Абурун арада лезги халкьдин межлис критика авурбурни, ам анжах диндин сергьятра аваз тешкилнавай мярекат яз гьисабайбурни авай. Межлис рамазандин вацраз мукьва яз кьиле тухуни ам диндин мярекат тирди тестикьарзавайбуруз чпин фикирдал генани кIевиз акъваздай мумкинвал гана…
Лагьана кIанда, межлисдин кьилин тешкилатчи республикадин Муфтият тиртIани, мярекат тек са диндин тах квайди тир лугьун дуьз туш. Аниз атанвай гьуьрметлу мугьманрин арада неинки са динэгьлияр, гьакIни гьукумдин органрин (министерствойрин, ведомствойрин, комитетрин, шегьерринни районрин администрацийрин), жемиятдин векилар, спортсменар, тарихчияр, жуьреба-жуьре рекьерай алимар ва масабур авай. Мярекатдин сергьятра аваз рахайбуру неинки са диндикай, гьакIни чи халкьдин милли медениятдикай, къадим тарихдикай, чи миллетдин уьмуьрда кьетIен гел тунвай кьегьал рухвайрикай, тербиядикай ва маса месэлайрикай ихтилатарна. Лезги халкьдин межлис рамазандин вацран вилик тешкилун дуьшуьшдин кар я. Адалай виликни и центрада маса халкьарин гьа ихьтин мярекатарни кьиле фена.
Зи фикирдалди, лезги халкьдин тIвар алай мярекат, сифте нубатда, хайи чIалал тешкилнайтIа, хъсан жедай. Вични Кьиблепатан Дагъустандин са районда. Адан сергьятра аваз винидихъ къейд авунвай месэлайрихъ галаз санал чи миллетдин тIал алай месэлаярни веревирд ийиз, абур гьялдай рекьер тайинариз, меслятар къалуриз жедай. Дердияр лагьайтIа, чахъ тIимил авач. ИкI хьун патал ихьтин крарин кьиле чи вилик-кьилик квай векилар, тешкилатар акъвазун герек я.
Махачкъалада кьиле фейи мярекатди чи халкьдин садвал къалурна. Ана гзаф кьадар жегьилри иштиракуни акьалтзавай несилрин рикIе ватанпересвилин, халкь сад хьунин гьиссер авайди къалурна. Им лагьайтIа, хушдиз кьабулиз, тебрикиз жедай кар я…
Мегьамед Ибрагьимов
