Дагъустандин мектебра тIуьн ва я гьакъидихъ тамамарзавай алава маса къуллугъар нагъд пул гун тийидай жуьредин проект кардик кутаз башламишнава. Ихьтин къуллугъди кIвалахунин тегьер ахтармишдай чка яз, Каспийск шегьерда авай Республикадин образованидин центр хкянава. Идакай РД-да авай Милли банкунин — Отделенидин пресс-къуллугъди хабар гузва.
Гьисабзавайвал, къуллугърин гьакъи нагъд пул гун тийидай жуьреда тешкилуни диде-бубайриз мектебра авай чпин аялрин харжияр гуьзчивилик кутадай, аялдив нагъд пул хьунихъ галаз алакъалу яз арадал къвезвай хаталувилерин вилик пад кьадай мумкинвал гуда. Гьа са вахтунда проектди образованидин идарайра бюджетдай тир харжийрин михьивал ва кьенятвал таъминарда.
Идалайни гъейри, мобильный алавадин куьмекдалди диде-бубайривай картадиз пул вегьез, мектебда гузвай тIуьнриз талукь делилар къачуз, аялди вуч незватIа, гьадал гуьзчивал ийиз ва образованидин пулдихъ тамамарзавай къуллугърай нагъд пул галачиз гьакъи гуз жеда.
“Республикадин образованидин идарайрин вилик са жерге важиблу месэлаяр ква. Абурукай яз — чирвилер гунин гьерекатда инновациядин технологияр ишлемишун, мектебрин чирвилер гунин гьерекатни, майишатчивилин кIвалахарни тамамдаказ рекъемламишун. Образованидин идарайриз талукь проектар уьмуьрдиз кечирмишун — им тек са нагъд пул галачиз гьакъи гузвай дуьшуьшрин кьадар артухарун туш. Иник мектебриз аялривай физ хьунал, анриз къвезвай аялрин кьадардал ва абуруз гузвай тIуьнрал гуьзчивал авунин месэлани акатзава.
Ахтармишунин проектдин сергьятра аваз школайра кIелзавай аялар патал 1500 карта гьазурнава. Фикирда ихьтин картаяр муаллимризни гун ава. И проект республикадин образованидин маса мектебрани кардик кутун финансрин рекьяй агьалийрин савадлувал хкажунин жигьетдай хъсан бине жеда”, — лугьузва проектдиз талукь яз Дагъустан Республикада авай Милли банкунин — Отделенидин руководитель Мурад Идрисова.
Къейд ийин, мектебра тIуьн ва я гьакъидихъ тамамарзавай алава маса къуллугъар нагъд пул гун тийидай жуьредин проект республикадин мулкунал нагъд пул галачиз ийизвай гьахъ-гьисабрин кьадар артухаруниз ва тIем акакьдай финансрин къуллугърин кьадар къвердавай гзафаруниз талукь “рекьерин картадин” кар алай хилерикай сад я.
РикIел хкин, проектдин “рекьерин картадал” Дагъустан Республикадин Гьукуматди, Россиядин Банкунин Кьиблепатан ГУ-ди ва Дагъустан Республикада авай Милли банкуни — Отделениди 2010-йисуз къулар чIугунай. Алай йисуз проект кардик жедай вахт давамарун пландик кутунва. 2021-йисуз кIвалах тухудай асул хилер тайинарнава: шегьердин округрин кура-кура маса гудай базарра муниципальный транспортдин такьатра нагъд пул галачиз гьакъи гудай къайдаяр кардик кутун, МФЦ-дин подразделенийра государстводин ва муниципальный къуллугърай пул QR-код ишлемишуналди гун.
РД-дин Милли банкуни — Отделениди алатай йисан нетижайриз талукь яз къейдзавайвал, республикада нагъд пул галачиз гьахъ-гьисабар авунин къайда къвердавай машгьур жезва. ИкI, алатай йисуз дагъустанвийри, маса къачузвай шейэрин гьакъи гудайла, 70 миллион сеферда банкарин картаяр ишлемишна. Им 2019-йисан кьадардилай 2 сеферда артух рекъем я. И къайдада ганвай гьакъидин санлай къачур кьадар 48 миллиард манатдиз барабар я — ам са йисан вахтунда 60 процентдин гзаф хьанва.
“Нагъд пул галачиз гьахъ-гьисабар ийизвай дуьшуьшрин кьадар йисалай-суз датIана гзаф жезва. Коронавирусдихъ галаз алакъалу гьалари лагьайтIа, республикадин агьалияр мукьвал-мукьвал карта ишлемишунин фикирдал анжах мягькемарнава. Региондин туьквенра картайрай пул къачудай 9 агъзур терминал эцигнава. Транспортда картадин куьмекдалди пул гунин къайдани къвердавай гзаф машгьур жезва. ГьикI лагьайтIа, икI къулайни я, хатасузни”, — гьисабзава Мурад Идрисова.
Жасмина Саидова
