Россиядин Игит Радим Халикьован тIварунихъ галай Кьулан СтIалрин юкьван школада хъсандиз кIелзавай, общественный уьмуьрда активвилелди иштиракзавай, чешнелу ахлакь авай аялар гзаф ава. Абурукай яз, чавай 8 “б” класс­дин ученик  Амирхан  Шагьбазован  тIвар кьаз жеда.

Амирхан школада ва районда тухвай олимпиадайрин гъалибчи ва призер я. ИкI, районда лезги авторрин шиирар ус­таддаказ хуралай кIелунай тухвай конкурсда приздин чка кьур А.Шагьбазоваз мергьяматлувилин “Умуд” фондунин Гьуьрметдин грамота ва Дагъустандин халкьдин шаир Майрудин Бабаханова гьазурнавай лезги ва урус чIала­рин гафарган гана.

А. Шагьбазова вичин алакьунар райондин умуми образованидин школайра кIелзавайбурун арада тухвай “Чи булахар — чи чешмеяр”  конкурсдани къалурна, ада 1-чка кьуна.

Хуьруьн мулкуна авай булахрин, кьилди къачуртIа, «Кпул ятар» участокда чиликай хкатзавай ятарин менфятлувиликай Амирхана кхьей сочинение республикадин конкурсда 2-чкадиз ла­йихлу хьана.

Амирхан Шагьбазоваз ва адан проектдин руководитель, муаллим Мислимат Ос­мановадиз РД-дин образованидин ва илимдин министерстводин гьуьр­мет­дин грамотаяр ва къиметлу пишкешар гана.

Къейд ийин хьи, республикадин конкурсдин жюридин член тир чи баркаллу районэгьли, Каспийск шегьердин депутатрин собранидин председатель Абдулвагьид Жаватова А.Шагьбазован кIва­лахдиз еке къимет гана.

Хазран  Кьасумов