5-9-апрелдиз республикада “Йисан муаллим — 2021” конкурсдин региондин пай кьиле фена. Нетижада Дагъустандин виридалайни хъсан муаллим вуж ятIа тайин хьанва — алай йисуз и тIварцIиз Дербент шегьердин Дуьньядин культурадин гимназиядин обществознанидин муаллим Гьажимирзе Марданов лайихлу хьанва.
Конкурсда кьвед лагьай чка Махачкъаладин 22-нумрадин лицейдин математикадин муаллим Егана Къурбановади кьуна. Пуд лагьай чкадиз пуд муаллим лайихлу хьанва: Къизляр райондин Краснооктябрское хуьруьн Р.Гьамзатован тIварунихъ галай СОШ-дин сифтегьан классрин муаллим Елена Агапова, Мегьарамдхуьруьн райондин Кркарин хуьруьн Гь.Аликберован тIварунихъ галай СОШ-дин ингилис чIалан муаллим Зарина Магьамдалиева ва Махачкъаладин 46-нумрадин СОШ-дин информатикадин муаллим Абубакар Къойтемиров.
Дагъустандин виридалайни хъсан муаллим лагьай тIвар патал конкурсда республикадин вири пипIерай тир 26 педагогди иштиракна. Абур сифтедай мектебдин, ахпа муниципальный ва зональный сергьятрай агалкьунралди экъечIна. И йикъара муаллимри чпин бажарагъ ва пешекарвилин алакьунар республикадин дережада къалурна.
Муаллимри конкурсдин сергьятра аваз ачух тарсар, мастер-классар ва тарсарилай къерехдай тир мярекатар кьиле тухвана, педсоветдал чпин регьбервилин ерияр ва вилик эцигнавай месэлаяр кьил-кьилеллаз гьялдай алакьунар малумарна.
Конкурсдин иштиракчийриз къиметар РФ-дин лайихлу муаллимрикай, РФ-дин образованидин хилен Гьуьрметлу работникрикай ва Халкьдин просвещенидин отличникрикай ибарат жюриди гана.
“Муаллимдин пешедин машгьурвал, адаз ийизвай гьуьрмет садрани агъуз аватдайди туш, муаллимрин тIварар абуру тарс гайи -аялрин рикIера эбеди яз амукьда, абуру гьар юкъуз зурба кIвалах тухузва. “Йисан муаллим” — им виче иштиракун гъалиб хьунилай важиблу тир конкурс я. Гъалиб хьанвайбур виридалайни хъсан муаллимар тирди абуру тарс гузвай аялар Вирироссиядин олимпиадайра гзаф сеферра гъалиб хьуни субутзава”, — къейдна РД-дин образованидин ва илимдин министрдин везифаяр вахтуналди тамамарзавай Яхья Бучаева.
Конкурсда гъалиб хьайи муаллимриз грамотаяр ва пулдин пишкешар гана. Сад лагьай чка кьур муаллимди Вирироссиядин паюна Дагъустандин патай иштиракда.
«Лезги газет»
