Образованидин рекье гзаф йисара бегьерлувилелди кIвалахзавай лайихлу муаллимрикай сад Мегьарамдхуьруьн райондин Бут-Къазмайрин мектебда тарсар гузвай Мукаил Агьмедович Агьмедов я.
Мукьвара чаз малум хьайивал, яргъал йисара образованидин рекье чIугунвай зегьметдиз килигна, Мукаил Агьмедович алатай йисан эхирра Россиядин марифатдин министрдин къарардалди хурудал алкIурдай “РФ-дин марифатдин ва тербиядин сейли къуллугъчи” лишандалди къейдна.
Ахцегь райондин Ухулрин хуьре 1954-йисан 31-августдиз дидедиз хьайи Мукаил Агьмедова гьеле мектебда амаз химиядиз гзаф итиж авуна. 1976-йисуз ада вуздин химиядин факультет агалкьунралди куьтягьна, сифтедай кьуд йисуз пешедин рекьяй кIвалахна. 1980-йисалай инихъ Бут-Къазмайрин мектебда тарсар гузвай муаллимдихъ къе зегьметдин еке стаж хьанва. И йисара ада физкультурадин тарсарни гана, адан регьбервилик кваз хьайи командади шегьеррин, республикадин дережайрин спортдин хейлин мярекатра, спартакиадайра агалкьунар къазанмишна. Иллаки пут гадаруниз, йигиндиз чукуруниз талукь акъажунрай кIвенкIвечи чкаяр кьурбурун кьадар гзаф я. Чирвилерин жигьетдайни адан ученикрин шикилар жуьреба-жуьре йисара лайихлубурун доскадал жезва.
Мукаил муаллим кIелзавайбуруз фадлай чизвай шаир, гьикаятчи, РФ-дин писателрин Союздин член я. Адан къелемдикай “Гьахъунин ван”, “Бинейрин кьилив”, “Руьгьдин хирер”, “Фикиррин нурар”, “Зи умудрин елкен” ва маса ктабар хкатнава.
2004-йисалай инихъ Мукаил муаллимди уьмуьрдин хатасузвилин дибар чирунин тарсар гузва. КIвалахдив рикI гваз, гьакъисагъвилелди эгечIзавайвиляй и рекьени адахъ лайихлувилерни агалкьунар хьанва. Ада чирвилер гайи 40-далай гзаф ученикар уьлкведин жуьреба-жуьре шегьерра аскервилин кьилин мектебрик, училищейрик, вузрик экечIна. Абурукай 28-дахъ алай вахтунда лейтенантвилин чин хьанва. ОБЖ-дин тарсар гузватIани, ам вичин асул пешедивай — химиядивай — яргъаз хьанвач, ученикриз ЕГЭ-диз гьазур хьунин карда куьмекар гузва.
Муаллимдин кIвалахдин бегьерлувал адан ученикри гьар йисуз олимпиадайра ОБЖ-дай къазанмишзавай агалкьунрини успатзава. Райондин ОБЖ-дин муаллимрикай сифте яз, ада 2012-йисуз республикадин “Йисан муаллим” конкурсдани иштиракна. Мектебда арадал гъанвай ОБЖ-дин махсус кабинетни чешнелубурукай сад я.
Акьалтзавай несилриз ватанпересвилин тербия гузвай муаллимди-шаирди вичин ученикар лезги шииратдални кьару ийизва. Адан регьбервилик кваз эдебиятдин конкурсра иштиракзавай аялри хъсан чкаяр кьунвай дуьшуьшар садни кьвед туш. Кьилди къачуртIа, адан кьуд ученикди вири халкьарин эдебиятдин конкурсда тафаватлу чкаяр кьуна.
Мегьарамдхуьруьн райондин образованидин управлениди М.Агьмедован зегьмет гьуьрметдин грамотадалди къейднава. Муаллимдихъ, адан ученикрихъни агалкьунар мадни гзаф ава. Ибур гьевесдивди кIвалахайла арадал къвезвай нетижаяр я.
Къуй чи бажарагълу муаллимдихъ рикI алай кIвалах яргъалди давамардай сагъвални шадвал хьурай!
К.Ферзалиев
