РД-дин минтуризмдин кьилин сад лагьай заместитель Эмин Мерданов Дагъустандин туризмдин ва художественный сеняткарвилерин министрдин везифаяр вахтуналди тамамарзавайди яз тайинарнава. Талукь тир указдал региондин Кьил Сергей Меликова 13-апрелдиз къул чIугуна.
“РД-дин туризмдин ва халкьдин художественный сеняткарвилерин рекьяй министрдин везифаяр вахтуналди РД-дин туризмдин ва халкьдин сеняткарвилерин министрдин сад лагьай заместитель Мерданов Эмин Мердановичан хиве тван”, — лугьузва документда.
Э.Мерданова 2014-йисуз М.В.Ломоносован тIварунихъ галай Москвадин госуниверситет, 2016-йисуз гьа и вуздин “Востоковедение и африканистика” пешедай магистратура, 2017-йисуз РФ-дин къецепатан крарин министерстводин “Московский государственный институт международных отношений” (университет), “Менеджмент” пешедай къецепатан чIал чирдай магистратура куьтягьна. Идалай гуьгъуьниз Москвада жуьреба-жуьре ведомствойра кIвалахна.
***
РД-дин Кьилин везифаяр вахтуналди тамамарзавай Сергей Меликова РД-дин Гьукуматдин ва крар идара ийидай гьукумдин органрин гьакъиндай кадрийрихъ галаз алакъалу са жерге къарарар кьабулна. Региондин руководителди абурал 12-апрелдиз къулар чIугуна.
Гьа икI, РД-дин Гьукуматдин Председателдин заместитель Владимир Лемешко вичин везифаяр кьилиз акъудуникай азадна. Адан чкадал икьван чIавалди республикадин энергетикадин ва яшайишдинни коммунальный майишатдин министерстводиз регьбервал гузвай Манвел Мажонц тайинарна.
Дагъустан Республикадин энергетикадин ва яшайишдинни коммунальный майишатдин министрвиле виликдай РД-дин эцигунрин ва ЖКХ-дин министрдин заместителвиле кIвалахай Ризван Мурадов эцигна.
Идалай гъейри, региондин туризмдин ва халкьдин художественный сеняткарвилерин рекьяй министр Расул Ибрагьимов къуллугъдикай азадна.
«Лезги газет»
