(Эвел — 9-13-нумрайра)
ГьакIни Пайгъамбардиз (къуй Аллагьдин патай салават ва саламар хьурай вичиз) и йифиз ивидин вацIа эхъвезвай ва къванер туькьуьнзавай инсан акуна. Пайгъамбарди (къуй Аллагьдин патай салават ва саламар хьурай вичиз) хабар кьуна: “Им вуж я, Жабраил (Аллагь рази хьурай вичелай)?”. Жаваб ихьтинди хьана: “Ам селемчивал, файдачивал (ростовщичество) авур кас я”. И йифиз Пайгъамбардиз (къуй Аллагьдин патай салават ва саламар хьурай вичиз) аламатдин крар мадни акуна. Адаз ракьун кикер алай инсанар акуна. Абуру, чпи чпин чинар чухваз, ивияр акъудзавай. Пайгъамбарди (къуй Аллагьдин патай салават ва саламар хьурай вичиз) абур вужар ятIа хабар кьурла, адаз «абур сада-садакай фитнеяр ийизвайбур я» лагьана, жаваб хгана.
ГьакIни, Пайгъамбар (къуй Аллагьдин патай салават ва саламар хьурай вичиз) дередай физвайла, адаз нагьакьан, такIан къведай ни атана ва лап эйбежер, хуш тежер хьтин сесинин ван хьана. Расулди хабар кьуна: “Им вуч я?”. Жабраила (Аллагь рази хьурай вичелай) жаваб хгана: “А сес Жегьеннемдин сес я, Аллагьдивай куьмек тIалабзавай”.
Садрани чинал хъвер алачир, я тежедай, Жегьеннемдин пачагь, гьаким Малик тIвар алай малаикди Пайгъамбардиз (къуй Аллагьдин патай салават ва саламар хьурай вичиз) са гъвечIи тIеквендай ана авай мусибатдин крар ва гунагькар инсанрин кьилел гьихьтин зулумарни жазаяр къвезватIа, къалурна.
Ахпа Пайгъамбардиз (къуй Аллагьдин патай салават ва саламар хьурай вичиз) Жегьеннемдин тарцелай емишар незвай са десте инсанар акуна. “Ибур вужар я?” лагьана хабар кьурла, адаз жаваб гана: “Абур ви уьмметдин инсанар я, Аллагьди чпиз ганвай девлетрикай я закат, я садакьа, я шафакъат тагай”.
Са итим файдасуз кIарасрин чIехи хара хкажиз чалишмиш хьанвай. “А итимди вичел аманат яз ихтибарнавай чарадан шейэр вичиз кьаз алахъна”, — лагьана Жабраила (Аллагь рази хьурай вичелай).
Некягь авачиз, гъуьлуьхъай чинеба чара итимдилай аял ханвай дишегьли, хуруяр къармахрихъ галкIурна, куьрсарнавай.
Етимрин эменни чпиз кьаз алахъайбуру пис кузвай, ифей жуьгьенрин цукIвар туькьуьнзавай. ЧIуру крар авур гунагькар инсанар генани инсафсузвилелди жазаламишзавай.
Пакадин йикъан экуьнахъ цаварилай эвичI хъувурдалай кьулухъ Пайгъамбарди (къуй Аллагьдин патай салават ва саламар хьурай вичиз) вичиз акур, ван хьайи, кьилел атай вири крар ахъайиз башламишна. Адан гафарин ван хьайи мушрикри (динсузри), сада-садаз и суьгьбетрикай хабар гуз, зарафатрал вегьез, рахшандар ийиз хьана. Ахпа мушрикрикай сада аль-Къудсдин лишанрикай, тегьеррикай, шикилдикай, элкъвена къваларив гвай чкайрикай суьгьбет авун теклифна.
Анжах ана авай вахтунда Пайгъамбарди (къуй Аллагьдин патай салават ва саламар хьурай вичиз) шегьердиз дикъетдивди са акьван фикир ганачир. И арада Аллагьди Пайгъамбардин (къуй Аллагьдин патай салават ва саламар хьурай вичиз) вилерин дикъет аль-Къудс акун патал уяхарна ва ахпа ам вичивай мушрикри истемишзавай къайдада ахъайиз башламишна. Ибур аль-Бухаридинни Муслиман гьадисрин кIватIалда ачухдаказ ганва.
(КьатI ама)
Абдулзагьир Атаханов
