Къардаш Гьарунович Мамалиев чин тийидай кас Самур дереда авач жеди. Зурба производственник ва тешкилатчи тир ада советрин девирдин 1974-1977-йисара Ахцегь райондин “Хрюгский” ва 1977-1992-йисара машгьур “Заря” совхозриз регьбервал гана, а майишатар республикада кIвенкIвечибурун жергедиз акъудна.
Кьилди къачуртIа, гадарнавай Кьехуьлрин хуьруьз рехъ акъудна, аниз электричестводин линия тухвана, маларин ферма эцигна. Дагъдин атIугъай шартIара республикада сифте яз интенсивный технологийрин чешнелу багълар арадал гъана, дагъда кетерин къайдадин магьсулдарвилик кьил кутуна.
Ахцегь вацIалай Мичегьрин хуьруьз машинар фидай канатдин муьгъ туькIуьрна (яргъивал 300 метр тир ам гилани кардик ква). Мичегьрин “Хьыры” яйлахдиз 9,5 километрдин рехъ акъудна, ана Дагъустанда (мумкин я уьлкведани кваз) сифте яз гьуьлуьн дережадилай 2000 метрдилайни кьакьанда гатун МТФ эцигна, ам вижевайдаказ механизироватна. Гьана, дагъдин кукIва, Урусатдай чпи юкьван гьисабдалди йиса 3000-3500 килограмм нек гудай симментальский жинсинин малар гъана, хвена. Мичегьа 2 вацран къене ацадай 100 кализ МТФ эцигна. Лаян къаналдин яд муькуь патаз акъудна, виш гектарралди дагъдин уьруьшар цик кутун патал КIелез хивен дагъдай чIехи тоннель акъудиз эгечIна (чIехи пай крар -170 метр — тамамарайдалай кьулухъ, СССР чукIуникди, кIвалахар акъваз хьана). Гьайиф хьи, вири и алахъунар залум “перестройкади” чIурна.
Гуьгъуьнин йисара багъларни яшайишдин кIвалер селди тухуникай къутармишун патал Ахцегь, Самур вацIарин кьерен къерехар, махсус бандар ягъуналди, мягькемарна ва икI мад. Фикир гайитIа, машаллагь, ибур “Зегьметдин игит” гьуьрметдин тIвар гуниз лайихлу крар я. Амма Къ.Мамалиев шабагьрихъ калтугнач. Общественный майишатрин руководитель яз, ада вичин гъилик квай зегьметчияр гьевесламишунин мураддалди наградаяр гун патал къалуриз хьана.
И йикъара чи баркаллу ватанэгьли, зегьметдин ветеран Къардаш Гьарунович Мамалиева вичин 80 йисан юбилей къейдна. Адаз уьмуьрдин и лишанлу вакъиа Ахцегь муниципалитетдин кьил Осман Абдулкеримова, адан заместитель Вадим Агъасиева, депутатрин райсобранидин председатель Абдулкерим Полчаева, райондин агъсакъалрин Советдин председатель Къеземет Къеземетова, Ахцегьрин машгьур музейдин директор Агьмед Дагъларова, и цIарарин авторди ва масабуру мубаракна.
“Гьуьрметлу Къардаш Гьарунович! Хайи халкьдиз, уьлкведиз къуллугъун ваз, бажарагълу ватанпересдиз, рикIин буйругъ я. Хъсан майишатчи, активный общественный деятель, чешнелу хизандин кьил тир вуна акьалтзавай несил бубайрин баркаллу адетралди тербияламишун патал еке зегьмет чIугвазва. Куьмек ва меслят кIанибуруз ви кIвалин рак гьамиша ачух я. Уьмуьрдин девлетлу тежрибади, пешекарвилин гегьенш чирвилери, карчивилин ерийри ваз халкьдин яшайиш хъсанардай фикирар-рекьер уьмуьрдиз кечирмишдай мумкинвал гузва. Яргъал йисарин гьакъисагъ зегьметдалди вуна хайи район вилик тухуник, аваданлу авуник еке пай кутуна, гилани, яшаризни сагъламвилин гьалдиз килиг тавуна, чаз куьмекзава.
“Ахцегь район” муниципалитетдин администрациядин ва кьилди жуван патай ваз 80 йисан юбилей рикIин сидкьидай мубаракзава. Чи мурад ваз ва ви хизандиз сагъламвал, кьил кутазвай хъсан гьар са карда еке агалкьунар хьун я. Къуй ви рикI веледрикай динж хьурай, уьмуьр багърийрини рикIиз хуш дустари хушбахтлу авурай”,- кхьенва Ахцегь райондин регьбер О.М.Абдулкеримован къул алай тебрикдин чарче.
Дашдемир Шерифалиев
