ЦIийи ктаб
Писатель ва публицист, “Лезги газетдин” сиясатдин отделдин редактор Нариман Ибрагьимован къелемдикай хкатнавай нубатдин цIийи ктабдин тIвар “В борьбе за человечность, справедливость и дружбу” я. Ам Махачкъалада кардик квай “Мавел” чапханада урус чIалал и мукьвара акъатна.
Архивдин делилрал, документрал бинелу яз кхьенвай повестдин кьилин игит Кьурагь райондин Агъа Макьарин хуьряй тир полковник Масуб Магьмудов я. Ктабдин кIелчияр Россиядин ФСИН-дин отставкада авай полковник, чешнелу хизандин кьил, лайихлу буба, вафалу инсан, викIегь регьбер, рикI ачух амадаг Масуб Магьмудован уьмуьрдин муракаб рекьихъ ва кIвалахрихъ галаз таниш жеда.
РикIел хкин, “Инсанвилин, гьахълувилин, дуствилин женгина” тIвар алаз и ктабдин лезги вариант алатай йисуз акъатнай. Ктабдин метлеблувал фикирда кьуна, ам урус чIалал акъудунин къарар кьабулуни адан кIелчийрин сергьятар гегьеншарзава. Гьакъикъатдани, ктабдин кьилин игитдин уьмуьрдин керчек делилри, вакъиайри гзафбурун фикир желбзава. КIелчийриз чир жезва хьи, Масуб Магьмудов уьмуьрда “вири акунвай”, жавабдар, четин рекьерай экъечIдай уламар жагъуриз алакьнавай лайихлу ватанэгьли я. Шак алачиз, къенин аямдин акьалтзавай несилар патал им вижевай чешне я. Писатель Нариман Ибрагьимова адан чешнедалди чаз халисан инсанпересвал, халкьпересвал, ватанпересвал, адалатлувал, жуьрэтлувал, дуствал вуч ятIа, ахьтин ерияр хас инсандин кьисметдин верцIивилерни туькьуьлвилер къалурзава. Вирибуруз ашкара кар я хьи, адалатлувал, намуслувал вине кьазвай инсандал уьмуьрда четинвилер тIимил ацалтзавач. Гьахъвал гвайбур такIандайбур вири девирра жезва.
КIелзавайдахъ элкъвена, ктабдин авторди адан метлебдикай ганвай куьруь малуматдилай гуьгъуьниз Россиядин юстициядин министерстводин ВК-240 идарадин начальник, полковник В.Ф.Ермолаева Масуб Магьмудовакай кхьенвай келимайрилай ктабдин сифте кьил гатIунзава.
“Масуб Магьмудов женгинин селигъалу офицер я, ада Россиядин уголовно-исполнительный системада чIехи къуллугърал вичин везифаяр гьакъисагъвилелди кьилиз акъудна. Адахъ галаз санал къуллугъ авунал за дамахзава”, — лагьанва чи ватанэгьлидин гьакъиндай В.Ермолаева.
Къейд ийин, ктабдин кьилин игитдикай са кьадар делилар писатель Н.Ибрагьимова ктаб акъатдалди вилик “Лезги газет” кIелзавайбурузни теклифнай.
ЦIийи ктаб “Чи ажайиб алем”, “Ачух рикI авайди, жумартди”, “Аялвилинни жегьилвилин вахтар”, “Къазахстандин чилел”, “Сибирдин аязрин есирда”, “Гьейранардай зи ватан”, “Масуб Магьмудовакай багърийри, юлдашри, танишри ихтилатзава”, “Регьимлу дуст — чIехи хазина”, “Активный общественникди гьар са кардикай фикирзава”, “М.Магьмудован терефдарар” кьилерикай ибарат я. Гьар са кьилиз, эпиграф хьиз, халкьдин мисаларни ганва.
Кьилин игитдин хизандин, багърийрин, дустарин, юлдашрин шикиларни гуни ктабдин маналувал артухарзава.
К.Къалажухви
