Вакцина маса къачуна
Гватемала Россиядивай коронавирусдиз акси “Спутник V” вакцина маса къачунив эгечIнава. Идан гьакъиндай уьлкведин президент А. Жамматтеиди “La Hora” чешмедиз ихтилатнава.
Адан гафаралди, уьлкведи вакцинадин гьакъидин умуми кьадардин са пай агакьарнава ва мукьвал тир 15 йикъан къене 8 миллион доза агакьун вилив хуьзва. Гватемаладин гьукуматди кьве компонентдикай ибарат вакцинадин 16 миллион доза маса къачун кьетIнава.
Къейд ийин, Гватемалади Россиядин вакцина февралдин эхирда регистрация авунай. Россиядин алимри гьазурнавай “Спутник V” вакцина маса къачузвай уьлквейрин кьадар югъ-къандавай артух жезва.
Гими ахлудна
Малум тирвал, 23-мартдиз Суэцкий къанал нафт тухузвай чIехи “Ever Given” гимиди тамамдиз кIевирна. Къаналдин яд кьери чкадал алкIай гими санихъни юзун хъувунач. Нетижада дуьньядин экономикадиз тайин кьадарда зиянни хьана. Гзаф техника желб авуна кьиле тухвай кIвалахдин нетижада 6-апрелдиз Суэцкий къанал кIевирай чIехи гими кьери чкадилай анихъ алудиз алакьна. Исятда къаналда цин улакьрин гьерекат гуьнгуьна гьат хъувунва. Идакай “Новости” РИА-ди хабар гузва.
Арадал атай агьвалатдин себеб тайиндаказ гьелелиг чирнавач. Малумарзавайвал, ахтармишунин кIвалах яргъалди давам жеда.
Рахунар кьиле тухвана
Россиядинни США-дин векилри Украинадин кьиблединни рагъэкъечIдай пата гьаларин гьакъиндай рахунар кьиле тухвана. ТАСС-ди хабар гузвайвал, идакай РФ-дин МИД-дин кьилин заместитель С.Рябкова ихтилатна.
Рябкован гафаралди, Донбассда кьиле физвай гьерекатриз талукь яз Россияди тамам малуматар раижнава, инсанар гъавурдик кутунва.
Идалай вилик США-ди Украинадин гьаларин гьакъиндай Россиядихъ галаз ихтилатар кьиле тухуз гьазур тирди лагьанай.
Госдепартаментдин векилдин фикирдалди, США-ди Украинадин рагъэкъечIдай пата арадал къвезвай вакъиайрин патахъай “къайгъу чIугвазва”.
Дуствилин лишанар малумарна
Белоруссиядин президент А.Лукашенкоди республикадихъ галаз дуствилин алакъаяр авай уьлквейрин лишанар къалурна. Идакай “БЕЛТА” чешмеди малумарзава.
“Ашкара я, муьштериди вичин манатдалди, доллардалди ва я евродалди Белоруссиядин метягьдин ва я къуллугъдин къимет гузвай уьлкве чун патал дуствилинди я”, — лагьана Лукашенкоди.
Идалай вилик ада бязи уьлквейра Белоруссиядин векилханаяр кардик хьун герек авачир месэла тирди ихтилатнай.
Украинадин вице-премьер А.Резникован гафаралди, Белоруссия гуя Россиядин таъсирдик ква ва Киевди и уьлкведиз ихтибар ийизвач.
Кагьрабайри куьмекда
Америкадин алимри тайинарнавайвал, кагьрабадик жуьреба-жуьре антибиотикрин куьмекдалди сагъариз тежезвай бактерийрин азаррин аксина женг тухудай затIар ква.
Пешекарри кагьрабаяр гзаф авай Балтийский гьуьлуьн турпагъра 44 миллион йис идалай вилик къванциз элкъвенвай шкьакьар ахтармишнава. Къейдзавайвал, шкьакьдихъ бактерийриз, гьашаратриз аксивалдай таъсир авай.
Алимриз кагьрабадик абиетиновый, дегидроабиетиновый ва маса кислотаяр кваз жагъана. Абурун фикирдалди, инфекцийрин азарар сагъардай дарманар патал и кислотаяр хъсан мумкинвилер гудай цIийи такьатрин чешме я.
Санкцияр алудуникай рахана
США-дин терефдиз Ирандиз акси яз малумарнавай санкцийрикай бязибур къуватдай вегьез кIанзава, хабар гузва ТАСС-ди.
“Санкцияр кьезиларун лазим тирди чна аннамишзава. Максималистский истемишунрикай чаз хийир жедач”, — лагьана Госдепартаментдин пресс-къуллугъдин регьберди.
Виликдай Трампа Ирандиз акси яз кардик кутунвай санкцияр кьезиларунин месэладиз США-дин цIийи президент Байден килигдайди февралдиз малумарнай.
Артух жезва
ВОЗ-ди дуьньяда коронавирусдик рекьизвай инсанрин кьадар артух хьанвайдакай хабар ганва. “Лента.ру” чешмеди раижзавайвал, талукь тир делилар ВОЗ-ди тIугъвалдихъ галаз алакъалу яз гьар юкъуз чапзавай бюллетенда къалурнава.
Къейдзавайвал, алатай гьафтеда коронавирусдик кьейибурун кьадар 11 процентдин артух хьана. Кьилди къачуртIа, алатай гьафтеда дуьньяда 71 агъзур кас кьена. Галаз-галаз эхиримжи ругуд гьафтеда азарлу хьайибурун кьадарни артух хьанва — COVID-19 акатнавай кьуд миллиондилай гзаф ксар дуьздал акъуднава.
«Лезги газет»
