Пресс-конференция
6-апрелдиз “Дагъустан” РИА-дин майдандал медицинадин илимрин кандидат, Москвадин 115-нумрадин поликлиникадин духтур-уролог, Семашкодин тIварцIихъ галай общественный сагъламвилин НИИ-дин илимдин къуллугъчи, “Сагълам хуьр” проектдин регьбер, “Москвадин духтур” тIварцIин сагьиб Загьир Хидирович Агъамован, РФ-дин здравоохраненидин министерстводин А.Бакулеван тIварцIихъ галай институтдин илимдин къуллугъчи, медицинадин илимрин кандидат Дмитрий Маленкован, Бежтинский участокдин ЦРБ-дин кьилин духтур Али Абдулмежидован иштираквал аваз пресс-конференция кьиле фена. Ана республикадин СМИ-рин векилри иштиракна.
Загьир Агъамова арадал гъанвай ва кьилизни акъудзавай мергьяматлувилин “Сагълам хуьр” проектдин кьилин макьсад Москвадин медидарайрин духтуррин дестеди, Дагъустандин дагълух хуьрериз физ, анра агьалийрин сагъламвал пулсуздаказ ахтармишун, герек тир менфятлу меслятар гун я. Чарасузвал авайбуруз медицинадин вини дережадин технологийрин куьмекдалди Москвадин медидарайра сагъар хъувун патал куьмекарни ийизва.
Мергьяматлувилин проектдин сергьятра аваз духтур З.Агъамова икьван чIавалди Мегьарамдхуьруьн райондин Хъартас-Къазмайрин, Агъул райондин Тпигъ ва Дулдугъ хуьрера, ЦIунтIи, ЦIумада, Дербент районрин, Бежтинский участокдин агьалийрин сагъламвал ахтармишна.
Пресс-конференциядал духтур Загьир Агъамова ва муькуь иштиракчийри журналистрин са жерге суалриз жавабар гана. Ада куьрелди вичин кIвалахдикайни ихтилатна. Къейд авурвал, “Сагълам хуьр” проект сифте нубатда ватанэгьлийриз алакьдай куьмек гунин фикир аваз тешкилна. Дагъустандин хуьрера медицинадин жигьетдай мумкинвилерикай хабар авай духтурди, къайгъударвал къалуруналди, вичиз тешпигь авачир серенжем-проект арадал гъана.
“Духтурвилин кIвалахдилай гъейри, Москвада РАМН-дин (Россиядин медицинадин илимрин академия) Милли НИИ-да илимдин къуллугъчи яз, за алай вахтунда медицинадин илимрин докторвилин диссертациядин винелни кIвалахзава. Амма жуван ватанэгьлийрин къайгъударвал авун патал махсус проект гьазурун зи фикирдик фадлай квай. Алатай йисуз садлагьана коронавирусдин тIугъвал пайда хьуникди чавай проект кьилиз акъудиз хьанач, амма гуьгъуьнлай чна сифте камар къачуна. За гъиле кьунвай кардик Москвада авай зи юлдашри, жуьреба-жуьре рекьерай пешекар духтуррини къуьн кутунва, сагърай чеб”, — лагьана З.Агъамова.
Ада къейд авурвал, сифте сеферда Дагъустандиз 8 духтурдикай ибарат десте атана, гуьгъуьнлай абурун кьадар мадни артух хъхьана. Идалайни гъейри, мергьяматлувилин серенжемдик Дагъустандин медидарайра кIвалахзавай бязи духтурарни чпин хушуналди экечIна.
Проектдин иштиракчийри къейд авурвал, мергьяматлувилин серенжем и ва маса хуьрера, районра кьиле тухун патал тIалабзавай ксарин кьадар артух жезва. Мумкинвилериз килигна, проект уьмуьрдиз кечирмишунин кIвалах мадни давамардай къастар ава.
Лагьана кIанда хьи, жуван хсуси такьатрихъ ихьтин важиблу кар кьилиз акъудзавай ксарикай чав тек-туьк дуьшуьшра хабарар агакьзава. Им, сифте нубатда, жуван халкьдин вилик метлеблу кардалди ватанпересвал къалурун я. Дагъустандиз ихьтин ксар гьамиша герекзава. Дагъустандин Халкьдин Собранидиз ва я Госдумадиз кандидатура къалурдай фикир авачни лагьана хабар кьурла, З.Агъамова, алай вахтунда вич Москвада регистрация авунвай агьали тирвиляй, Дагъустандин Халкьдин Собранидиз депутатвиле кандидатура къалурун мумкин туширди лагьана. Эгер са гьи ятIа партиядиз Госдумада адакай чпин векил хьана кIанзаватIа, вичин патай разивал ава лагьана. Депутатвилин дережади адаз ватанэгьлийриз куьмекар авунин карда мадни еке мумкинвилер гудай. Къейд авурвал, кьилдин ксарихъ жегьил ва савадлу духтурдин кандидатура теклифдай ниятар ава. Къуй адан и мурад кьилиз акъатрай.
Бежтинский участокдин ЦРБ-дин кьилин духтур А.Абдулмежидова къейд авурвал, участокдин сергьятра 2 йикъан къене “Сагълам хуьр” проект кьилиз акъудунин нетижада Москвадин духтуррин десте 500-далай гзаф агьалийрин сагъламвилиз килигна. Идалайни гъейри, чкадин пешекарриз Москвадин духтуррин тежрибадикай менфят къачудай мумкинвал хьана.
“Сагълам хуьр” проектда иштиракзавай пешекаррикай гегьеншдиз Д.Маленкова ихтилатна. Малум хьайивал, Дагъустанда гзафни-гзаф рикIин ва онкологиядин азарри инсанар гьелекзава, и азаррихъ галаз женг чIугвадай пешекаррин кьитвални ава. З.Агъамован фикирдалди, Дагъустанда онкологиядин азаррин аксина женг тухудай диспансерар гьич тахьайтIа пуд хьун лазим я. Духтуррин дестеди журналистрин маса суалризни тамам жавабар гана.
К.Ферзалиев
