31-мартдиз  Махачкъалада, Р.Гьамза­тован тIварунихъ галай Милли библиотекада  Дагъустандин халкьдин писатель Къияс Межидован 110 йисан юбилейдиз талукь шадвилин мярекат тешкилнавай. Иниз писателдин хва, маш­гьур технолог — инженер Марат Къиясович Межидов, адан хизанар, мукьва-кьилияр, яратмишдай ва илимдин интеллигенциядин векилар, студентар, мектебрин аялар — милли эдебиятдал рикI алайбур атанвай.

Мярекат тешкилиз, зегьмет чIугур­бу­рук библиотекадин къуллугъчияр, писателрин Союздин векилар, маса  ксар квай. Библиотекадин дегьлизда юбилярдин яратмишунриз ва уьмуьрдин рекьериз бахшнавай ктабрин чIехи выставка ачухнавай.

Шадвилин и серенжем, куьруь гаф рахуналди, Дагъустандин писателрин Союздин секретарь, жегьил шаир Владик Батманова ачухна, кьилени тухвана.

ЧIехи ватанпересдин, инсанпересдин, чIалан заргардин ирсинин ва уьмуьрдин гьа­къиндай чпин фикирар лугьуз, мярекатдал библиотекадин чIехи къуллугъчи, РД-дин культурадин лайихлу работник С.Мусаева, литературовед, илимрин доктор, про­­фессор Къ.Акимов, илимрин доктор, РАН-дин ДНЦ-дин чIехи къуллугъчи Ф.Гъа­­ниева, Дагъустандин халкьдин писатель А.Исамилов, илимрин доктор, литературовед ва писатель Ф.Нагъиев, педагогикадин илимрин кан­дидат,  профессор Ш.Мирзоев, РД-дин гьукуматдин аппаратдин къуллугъчи, тарихдин илимрин кандидат М.Азизханов, ас­пирантка М.Ибрагьимова, маса ксар рахана.­

Меркездин ва Каспийскдин школайрай атанвай аялри юбилярдин хейлин эсерар хуралай кIелна. Баркалла чпиз ва абурун  муаллимриз!

Нальчикдай писателдин руш, машгьур­ художник Сияра Межидовади мярекатдин иштиракчияр интернетдин куьмекдалди тебрикна, бубадиз ихьтин гьуьрмет авунай вирибуруз сагърай лагьана.

ЧIехи писателдин ирсинин важиблу­виликай, адан метлеблувиликай, чIаланни сти­листикадин кьетIенвилерикай, эдебиятдин рекьел цIийиз экъечIзавайбур патал писателдин ирсиникай тарс хкудун лазим тирдакай вичин келимаяр и цIарарин ав­тор­дини лагьана.

Писателдин хва Марат Къиясовича, еке гъалаба кваз, бубадин уьмуьрдикай, адан ирс вичи ва маса ксари кIватI хъийизвай тегьердикай суьгьбетна, мярекатдиз атанвайбуруз сагърай лагьана.

Юбилейдихъ галаз алакъалу яз чапдай акъуднавай “Къени къуншияр” тIвар алай ктаб аялриз ва жегьилриз пайна.

Мердали  Жалилов