2-апрелдиз “Лезги газетдин” редакциядин конференц-залда Пенза шегьерда яшамиш жезвай писатель Садикь Гьажиеван яратмишунриз талукь мярекат-гуьруьш кьиле фена.
МЛНКА-дин председатель Пакизат Рагьимхановадин теклифдалди кьиле фейи мярекатда “Лезги газетдин” кьилин редактор Мегьамед Ибрагьимова, шаир, филологиядин илимрин доктор Фейзудин Нагъиева, шаир Фазил Асланова, “Суна чан” ансамблдин виликан манидар Римма Магьмудовади, “Лезги газетдин” къуллугъчийри иштиракна.
Мярекат ачухай М.Ибрагьимова писатель Садикь Абумуслимович Гьажиеван (тахаллус — Садко Гьажиев) уьмуьрдин рекьикай, чапдай акъатнавай адан ктабрикай куьрелди ихтилатна. Алай вахтунда Садко Гьажиеван 90 йис тамам хьанва. Ам Кьурагь райондин КIирийрин хуьряй я, фадлай Пенза шегьерда яшамиш жезва. Урусатда аватIани, бажарагълу писателди хайи ерийрихъ, дагъларихъ гьасрет чIугвазва. И кар адан эсеррайни, гьатта ктабрин тIварарайни чир жезва. Писателди шииратдин эсерар лезги чIалал кхьизва, гьикаятдинбур — урус чIалал. Алай вахтунда адан гъиле чапдай акъуд тавунвай 4-5 чIехи эсер ава. Ам Ватандин ЧIехи дяведин ва УФСИН-дин ветеран я. Къуллугъдин органрай ам майордин чинда аваз экъечIна.
Пакизат Рагьимхановади къейд авурвал, къариблухда кьегьалвилелди уьмуьр кьиле тухузвай С.Гьажиеван эсеррай адан ватан — КIирийрин хуьр — капун юкьвал алайди хьиз, ачухдиз аквазва.
Къариблухда авай писателдин кьисметдикай шаир ва алим Фейзудин Нагъиевани ихтилатна. Къейд авурвал, Урусатда яшамиш жезватIани, С.Гьажиева вичин чIал, эсил-несил, ватан ва ватанэгьлияр садрани рикIелай ракъурзавач.
“Лезги газетдин” жавабдар секретарь Шихмурад Шихмурадова Садко Гьажиев “КIири Буба” роман кхьейдалай кьулухъ халкьдиз чир ва машгьур хьайи писатель, четин, жавабдар кIвалах хиве авайтIани, хайи чIалаз, эдебиятдиз итиж авун, гьам лезги, гьам урус чIаларал эсерар, ктабар акъудун тебрикна кIандай кар тирдакай лагьана. Адахъ СССР-дин Игит Эсед Салигьовакай кхьенвай “Дагъларин хва” шииратдин чIехи эсерни ава.
Садко Гьажиев мукьувай чидай писатель ва журналист Нариман Ибрагьимова къейд авурвал, ам генерал Къагьримановакай ктаб кхьидайла, Дагъустандиз хтанай, яратмишунрикай итижлу суьгьбетарнай.
К.Ферзалиева Садко Гьажиева кхьенвай “Дагъларин хва” тIвар алай шииратдин чIехи эсердин чIалан девлетлувиликай ихтилатна. Кьилди къачуртIа, чал кхьинра, рахунра лап кьериз-цIаруз дуьшуьш жезвай, гьатта гафарганрани гьат тавунвай бязи гафар и эсерда гьалтзава.
Эхирдай Ш.Шихмурадова къейд авурвал, писателдин уьмуьрдизни яратмишунриз талукь мярекатар Кьурагь районда, хайи КIирийрин хуьрени тухун, ватанэгьлийриз адан бажарагълувиликай гзаф чир жедайвал гегьенш ихтилатар авун важиблу я. М.Ибрагьимова Садикь Гьажиеван гьеле чапдай акъат тавунвай романрикай сад кьванни Дагъустандин ктабрин чапханада акъудун герек тирди лагьана.
Чи мухбир
