И йикъара чав чIулав хабар агакьна: чавай денбеден лап хъсан инсан, вичин саки вири уьмуьр чи обществода къанун-къайда хуьнин кардиз бахш авур хва, чи газетдин вафалу амадагрикай сад хьайи къенепатан къуллугъдин полковник Абас Балабегович Къазиагьмедов гьамишалугъ яз къакъатна. Гьайиф…
А.Б.Къазиагьмедов 1949-йисуз Сулейман-Стальский райондин КIелейрин хуьре (1966-йисалай а хуьр Мегьарамдхуьруьн райондин Оружбайрин мулкунал эвичIнава) дидедиз хьана. Хайи хуьре сифтегьан, ЦицIигъа 8 йисан, Мегьарамдхуьруьн райондин Тагьирхуьр-Къазмайрал юкьван школа акьалтIарна.
Советрин Армиядин жергейра къуллугъна хтай жегьил Дагъустандин къенепатан крарин министерстводи Владимир шегьердиз, СССР-дин къенепатан крарин рекьяй махсус школадиз рекье туна.
1973-йисалай юриствилин образование авай жегьил лейтенант Махачкъалада кардик квай 1-нумрадин СИЗО-диз къуллугъдал хтана. Ина кIвалахиз, ДГУ-дин юридический факультет, ахпа Москвада СССР-дин МВД-дин Академияни акьалтIарна. Абас Балабегович къуллугъзавай идарада адан начальникдин дережадал кьван хкаж хьана. Къуьнерални сад-садан гуьгъуьналлаз чIехи чинер атана.
Яшар хьана, полковник А.Къазиагьмедов отставкадиз экъечIна. Амма тербияламишунин, къанун-къайда, эменни хуьнин везифайривай ам къерехда акъвазнач, жуьреба-жуьре идарайра, эхирдайни Мегьарамдхуьруьн районда, Каспийск шегьерда жегьил-жаванрин арада тербиядинни юридический рекьерай гъавурдик кутунин кIвалахар бегьемариз хьана.
Вичин уьмуьрда адал тади гьалда гьялна кIанзавай четин месэлаяр тIимил гьалтнач. Вири имтигьанрай ам дагъвидиз хас лайихлувилелди экъечIна.
Абас Балабеговичан рикI “Лезги газетдал”, милли культурадал, эдебиятдал гзаф алай, и рекье авай ксариз куьмекарни гудай. Писатель ва драматург Абдуселим Исмаилова кхьенвай, Лезги театрди сегьнеламишнавай “Дустагъда мехъер” драмадин кьилин игитрикай сад гьа начальник А.Б. Къазиагьмедов я.
Абас Балабеговичахъ къуллугъдин рекьерай ганвай государстводин ва ведомстводин чIехи шабагьар, тIвар янавай махсус яракьни авай.
Камаллу, гьунарлу веледрин бубадихъ, хтулрин чIехи бубадихъ хъсан ниятар гзаф авай. Вучда кьван, залум ажал инсафсуз я…
Чна рагьметлудан хизандиз, мукьва-кьилийриз башсагълугъвал гузва. Абас Балабеговичан экуь къамат чи рикIелай садрани алатдач.
“Лезги газетдин” редакциядин коллектив
