Квез чидани?

—           Кьуьгъуьрар нек хъвадай гьайванрин арада виридалайни къадимбур яз гьисабзава. Гьамиша аяз авай ва уьленлух чкаяр квачиз, амай виринра кьуьгъуьрар яшамиш жезва.

—           Кьуьгъуьррин вилериз экв зайифдиз аквада, амма ни ва ван лап хъсандиз къведа.

—           Дуьньяда кьуьгъуьррин 17 жуьре малум я.

—           Кьуьгъуьр вердиш жедай, кIвалин гьайванрихъ (месела, кицIихъ, кацихъ) галаз дуствал хуьдай гьайван я.

—           Кьуьгъуьрар чеб чпихъ галаз уьфтер ягъуналди “рахазва”.

—           Илимдин рекьелди пешекарри виридалайни гзаф ахтармишнавай кьуьгъуьр адетдинди (адаз Евро­падин кьуьгъуьрни лугьузва) я. И жуьредилай це сирнав ийиз алакьзава.

—           Гагь-гагь кьуьгъуьрри гъуьлягърални гъуьрч ийида, абурун зегьердиз кьуьгъуьрривай са кьадар дурум гуз жезва. Эгер гъуьлягъди са шумудра кIасайтIа, кьуьгъуьр патал женг бедбахтвилиндаз элкъведа.

—           Гатун муддатда кьуьгъуьрри бес кьадарда пи кIватIун (чеб куькарун) гзаф важиблу я. Эгер октябрдин вацра кьуьгъуьрдин заланвал 500 граммдилай тIи­мил хьайитIа, чилада авай вахтунда ам гиликьун мумкин я. Адет яз, кьуьгъуьрар 128 юкъуз чилада жеда.

—           Кьуьгъуьрар салара, багълара инсанрин куьмекчияр я: абуру зарарлу гьашаратар, кьифер ва масабур тергзава.

—           Са кьуьгъуьрдал тахминан 10 агъзур цаз ала. Абур пуд йиса садра цIийи жезва.

—           ЧIехи кьуьгъуьрар 4-7 йисуз яшамиш жезва, гъвечIибур – 2-4.

—           Кьуьгъуьрар йифен гьайванар яз гьисабзава.

«Лезги газет»