Къведай йисуз Россиядин Банкди уьлкведин регионрикай сада ракьун пулар кIватIунин чкаяр кардик кутунин проект (пилот) гъиле кьун планламишнава. Идакай банкунин пресс-къуллугъди хабар гузва.
Центральный банкди гьисабзавайвал, и кар ракьун пулар ишлемишунин къайда хъсанарун патал фикирда кьунва. Центробанкди гьисабзавайвал, “пилот агьалийрин къулайвилихъ туькIуьрнава”. Пулар кIватIдай тадаракар гьинал эцигдатIа ва абурун кьадар гьикьван жедатIа тежрибадин проектдиз ийизвай истемишунар кьилиз акъудайдалай кьулухъ малум жеда.
ЦБ-дин алай йисан сифте делилралди, агьалийрин гъилера, санлай къачурла, 113,2 миллиард манатдиз барабар тир 69,126 миллиард ракьун пулар ава.
Агьалийрин гъилера къекъвезвай нагъд пуларин, иллаки ракьунбурун, кьадар къвердавай тIимил хьунин гьерекат инлай кьулухъни давам жеда, гьикI лагьайтIа, россиявийри, гьахъ-гьисабар ийидайла, нагъд тушир жуьредин къайда хкязава. Пешекарри гьисабзавайвал, и кар агьалийрилай ваъ, и хиле машгъул органрилай аслу я. Абуру исятда жемятдин гъиле авай нагъд пуларин кьадар тIимиларунихъ элкъуьрнавай жуьреба-жуьре серенжемар кьиле тухузва. Кьилди къачуртIа, ракьун пулар кIватIзава. Малум хьайивал, и кардин себебрикай сад ам я хьи, ракьун куьлуь пулар акъудун абурун къиметдилай багьаз акъваззава. Сифтени-сифте и месэла кепекрин пулариз талукь я. Ракьун манатар лагьайтIа, оборотдай 5-10 йисан вахтунда акъудда.
Идалай вилик Россиядин Банкди, 2025-йис алукьдайла цIийи хъувунвай чарарин пулар акъуддай фикир авайдакай лагьанай. Абурал федеральный вири округрин тамашуниз лайихлу чкаяр жедайвал я.
«Лезги газет»
