(Эвел — 9-12-нумрайра)
ГьакIни Пайгъамбардиз (къуй Аллагьдин патай салават ва саламар хьурай вичиз) къванеривди чпин келлеяр ягъиз кукIварзавай, ахпа чеб чпел хквезвайбур акуна. Ада хабар кьуна: “Ибур вужар я?”. Адаз жаваб гана: “Абур капI авуниз кагьулвал авурбур я”.
Мадни адаз, зунжуррал кутIунна, девейрин сесинал къув язавай инсанар акуна, чпини цацар алай цIамар жакьвазвай, зейтундин ва гьакIни Жегьеннемдин тарцин лап эйбежер пис ни галай емишар незвай, бязибуру лагьайтIа, Жегьеннемдин къванерни кваз туькьуьнзавай. Жабраила (Аллагь рази хьурай вичелай) абурукай икI лагьана: “Абур шафакъат садакьа тагайбур я”.
Гьа и йифиз Пайгъамбардиз (къуй Аллагьдин патай салават ва саламар хьурай вичиз) мад тажуб жедай жуьредин инсанар акуна. И инсанрив хъсан темягь фидай ва лап пис ни галай ктIай якIар гвай, амма абуру хъсан як туна, пис як незвай. Мягьтел хьайи Пайгъамбарди (къуй Аллагьдин патай салават ва саламар хьурай вичиз) хабар кьуна: “Я Жабраил (Аллагь рази хьурай вичелай), им вучтин аламат я заз аквазвайди?”. Жабраила (Аллагь рази хьурай вичелай) жаваб гана: “Ам мисал, чешне я ви уьмметдиз талукь тир. Яни кIвале авай гьалаллу паб туна, чара дишегьлидин гуьгъуьна гьатна, зина ийизва ва вичиз гзаф кьадар гунагьар къазанмишзава. ГьакI и месэла дишегьлийризни талукь я. КIвале хъсан гъуьл авай дишегьлини рекьелай алатзава. Итим — кIвале, вич лагьайтIа, чара итимрихъ галаз зина ийиз, гунагьар къазанмишиз…”.
(Кьатl ама)
Абдулзагьир Атаханов
