(Эвел — 2020-йисан 44-52, 2021-йисан 1-9, 11-12-нумрайра)
- Али халифадиз (Аллагь рази хьурай вичелай) акси экъечIай “хаварижрин” патай фитне ва зулум мадни артух хьана ва эхирдай абуру муькуь патан илчийри меслят гъайи “Къуръанда къалурнавай дувандин икьрар” кьабулна лугьуз, Алиди (Аллагь рази хьурай вичелай) куфр авунва лагьана. Хаварижар къал-къиж тваз, ягъиз рекьиз, гунагь крар ийиз гатIунна. И кардикай кьушунарни галаз Шамдиз физ рекьевай Али халифадиз (Аллагь рази хьурай вичелай) хабар хьана. Ада эвелни-эвел хаварижар секинардай къарар кьабулна. Кьве дестени “ан-Нагьраван” лугьудай чкада гуьруьшмиш хьана ва нетижада хаварижар тергна.
Амма гуьгъуьнлай Али халифадин (Аллагь рази хьурай вичелай) кьушунда авай Иракдин агьалийрикай гзафбур Алидиз (Аллагь рази хьурай вичелай) муьтIуьгъ хъхьанач, абур адакай чара хьана… (Шариатдин делилри тестикьарзавайвал, и гьуьжетар хьайи крара Али халифа гьахъ тир).
…Эхирдай хаварижрин башчийрикай тир Абдуррагьман ибн Мулжим лугьудай (алчах) касди гьижрадин 40-йисан рамазан вацран 17-юкъуз Али халифа (Аллагь рази хьурай вичелай) яна кьена. Адан кьилихъ жаназа капI адан хва Гьасана (Аллагь рази хьурай вичелай) авуна. Халифа Куфада кучукнава, сур алай чка инсанриз малум тежедайвал авунва (душманри, харижитри сурук кя тавун патал). Яна кьейи чIавуз адан 63 йис тир. (А къанлу Ибн Мулжим — Алидин хци — Гьасан асгьабди (Аллагь рази хьурай чпелай), кьисас яз, яна хкьена ва адан мейитни цIай яна кана).
(Кьатl ама)
Ямин Мегьамедов,
диндин рекьяй алим
