Тарихдин, архитектурадин ва культурадин музейрин макан хьиз , Дербент спортдин шегьерни я. Агьалийрин ва иллаки акьалтзавай несилдин сагъламвал, бедендин лигимвал мягькемарунин мураддалди шегьерда физкультура ва спорт вилик тухуниз, спортдин школаяр ва майданар артухаруниз кьетIен фикир гузва. Ингье, и барадай шегьердин администрациядин спортдин отделдин начальник Наваи Рзаева вуч лугьузватIа:
— Алай вахтунда Дербентда 9 махсус спортшкола кардик ква ва анра пулсуздаказ 2884 кас жаванри спортдин рекьяй вердишвилер къачузва. Спортшколайра тренерар-муаллимар яз кIвалахзавай вири 102 касдихъ физкультурадин рекьяй кьилин ва юкьван образование авайбур я.
Махсус спортшколайрилай гъейри, — къейдзава Н.Рзаева, — шегьердин вири микрорайонра, мектебра, кьилин ва юкьван образованидин идарайра агьалияр, студентар, мектебра кIелзавай аялар спортдал машгъул хьун патал мини-футболдин майданар ва спортзаларни кардик ква.
И мукьвара спорткомитетди шегьерда физкультура ва спорт вилик тухунин рекьяй алатай йисан нетижаяр кьуна. Абур разивал ийиз жедайбур я. ИкI, 2017-йисуз къадим шегьерда спортдин хейлин жуьрейрай чкадин ва республикадин акъажунар, турнирар, чемпионатар кьиле тухвана. Анра 17 агъзурдалайни гзаф спортсменри иштиракна.
Къадим Дербентди вичин тIвар-ван авай спортсменрал дамахзава. Ингье, абурукай анжах са кьадарбур: азаддаказ кьуршахар кьунай Европадин чемпион Даурен Куругълиев, дзюдодай дуьньядин кубокдиз лайихлу хьанвай Камал Ханмегьамедов, кьезил атлетикадай международный акъажунра са шумуд сеферда гъалиб хьанвай спортдин ветеран Магьарам Гьасанханов, каратэ-кекусинкайдай СКФО-дин чемпион Олеся Жандарова, кьезил атлетикадай са шумуд рекорддин сагьиб тир Руслан Максимов, жегьилрин “Анжи” командадин футболист Анар Панаев ва хейлин масабур.
Наваи Рзаеван гафаралди, Дербентда спортдин мектебар, майданар, залар артухаруниз, спортсменрин устадвал хкажуниз, спортдин вири жуьрейрай акъажунар тешкилуниз алукьнавай 2018-йисуз мадни артух фикир гуда.
Къунши уьлкведай -медалар гваз
Са кьадар вахт идалай вилик Азербайжандин меркез Бакуда жаванрин арада кьезил атлетикадай международный турнир кьиле фена. Акъажунра Туьркиядай, Гуржистандай, Дагъустандай ва гьакIни чкадинбур тир 70 спортсменди иштиракна.
Шад жедай кар ам я хьи, и турнирда иштиракай Дербентдай тир кьве спортсменди — Диана Ибрагьимова (яргъивилиз хкадарунай) ва Алексей Дунаев (троеборьедай) хайи шегьердиз буьруьнждин медалар гваз хтана.
Боксдай акъажунар
И мукьвара Дербент шегьердин жегьилринни жаванрин 7-нумрадин спортшколада (ДЮСШ) боксдай акъажунар кьиле тухвана. 10-16 йисал къведалди яшара авай спортсменри заланвилин 12 категориядай чпин алакьунар къалурна. Акъажунра жаван боксерар тир Гь.Гьуьсейновади, М.Агьмедовади, Э.Аскеровади, М.Мирземегьамедовади, М.Сеидовади, вири санлай, 11 касди 1-чкаяр кьуна.
Турнирдин “Лап хъсан боксер” тIварцIиз 7-нумрадин ДЮСШ-дин векил Гьасан Гьуьсейнов лайихлу хьана.
Нариман Къарибов
