Аялрин ва жаванрин спортдин школайрихъ акьалтзавай несилар сагъламбур хьунин, абуруз дуьзгуьн тербия гунин жигьетдай еке мумкинвилер ава. Кьилинди, спортдин школайри аялар куьчедивай, чIуру, зиянлу гьерекатривай, краривай къерех ийизва. Школада инструктор-методиствиле кIвалахзавай кьуд йисуз зун и кардихъ кIевелай инанмиш хьана.
Шегьердин 4-нумрадин ДЮСШ 2005-йисалай кардик ква. Тарих са акьван екеди туштIани, 18 касдикай ибарат чи коллективди вичин хиве авай везифаяр — аялар школадиз желб авун, абуруз спорт, сагълам уьмуьр кIанарун, общество патал лайихлу инсанар жедай жуьредин тербия гун — гьакъисагъвилелди кьилиз акъудзава. Идан гьакъиндайни ДЮСШ-ди къазанмишзавай агалкьунри шагьидвалзава. Школада 306 жаванди вердишвилер къачузва.
ИкI, 2016-йисуз республикадин ДЮСШ-рин арада чи школади “Спортдин лап хъсан школа” номинациядай 1-чка кьуна. Армспортдай тренер Шалбузов Гьажимегьамед “Лап хъсан тренер” тIварцIиз лайихлу хьана. 2014-йисуз азаддиз кьуршахар кьадайбурун тренер Абдурагьимов Къурбанакай “Лап хъсан тренер” хьана.
Школада спортдин 8 жуьредай вердишвилер, чирвилер гузва. Шегьердин аялар рикI алаз кьуршахар кьунал, дзюдодал, боксдал, армспортдал, залан атлетикадал, футболдал, грэпплингдал ва тIамайрал машгъул жезва. Школадин директор Шалбузов Гьажимегьамед кьиле аваз 12 тренерди аялрихъ галаз мукьуфдивди кIвалахзава. Нетижаярни рикI шадардайбур жезва. Жаван спортсменри Кьиблепатан Дагъустанда (Ахцегь, Мегьарамдхуьр, Сулейман-Стальский, Кьурагь, Табасаран районар, Дербент, Избербаш шегьерар) тешкилзавай акъажунра иштиракзава, чпин устадвал хкажзава ва ахпа республикадин, Россиядин ва международный турнирра, чемпионатра агалкьунар къалурзава.
Алай йисан февралдин сифте кьилера Москвада грэпплингдай Европадин чемпионат кьиле фена. Чи тербиячияр тир Рамазанов Рагьметуллагьа (75 кг) ва Мегьамедов Бахтияра (100 кг) къизилдин медалар къачуна. Абур спортдин мастерар я. Эльдаров Магьмуд (55 кг) буьруьнждин медалдиз лайихлу хьана. Абуру Дубайда кьиле фейи международный турнирдани 1 ва 2-чкаяр кьуна.
Къейд авун лазим я хьи, аялрихъ галаз гьевесдивди кIвалахзавай тренер Нурудинов Мурад (85 кг) грэпплингдай ва джиу-джитсудай пуд сеферда дуьньядин чемпион хьайиди я. Ада вичин чирвилер, сирер хушвилелди жаванриз гузва.
Азаддиз кьуршахар кьадайбурни (тренерар Эльман Магьмудов, Къурбан Абдурагьимов) гуьгъуьна акъваззавач. Шаз Дагъустандин чемпионатда (2000-2003-йисара хайибурун арада) Барлыбаев Тимура (50 кг), Магьмудов Рената (75 кг) 1-чкаяр кьуна.
Дзюдодал машгъул жезвай Керимов Руслана йисалай-суз вичин устадвал хкажзава ва иштиракай акъажунрай гъалибчи яз хквезва.
Чи гадаяр армспортдин секциядиз рикI алаз къвезва. Къуватлу гъилерин иесияр хьун патал абуру тренер Гь.Шалбузован (ам вич Дагъустандин, Россиядин чемпион я) истемишунар, ян тагана, кьилиз акъудзава. Абур чеб-чпелни алахъзава. Дербентда, Махачкъалада, Мегьарамдхуьре тешкилай турнирра Алигъаев Мегьамеда, Ханмегьамедов Казбека, Абдулаев Агьмеда, Расулов Ражаба, Шалбузов Мирзехана, Халилбегов Руслана, Мирзоев Расима хъсан вердишвилер къачузва. Къе-пака абуру чпикай ван алаз малумарда, неинки республикадин, гьакI дуьньядин спортдин майданрани.
Чи школа республикадин образованидин ва илимдин министерстводин къурулушда хъсан чкадал ала. Финансрин рекьяй мумкинвилер са акьван екебур туштIани, коллектив кIвачихъ галай спортзал, стадион, кабинетар чавай истемишзавай къайдада хуьз алахъзава. Чахъ чи сайтни ава ва чи гьар йикъан кIвалахрикай ана материалар, шикилар эцигзава.
Лугьун лазим я хьи, инструктор-методист яз за жуван везифаярни намуслувилелди бегьемарзава. ДатIана тренеррин кIвалахдал, абуру аялриз чирвилер, вердишвилер гузвай гьалдал гуьзчивалзава, школадин коллективдин вири кIвалахдиз талукь гьахъ-гьисабар (отчетар) гьазурзава, сайтдал кIвалахзава ва лазим маса крарни вахтунда кьилиз акъудзава. Гьа са вахтунда жаванарни жуван гуьзчивиликай хкудзавач. Лагьана кIанда хьи, спортди абуруз чпин вахт дуьздаказ тешкилдай ва ишлемишдай мумкинвал гузва. Абуру чеб школайрани, куьчедани чешнелудаказ тухузва, тарсарайни вилик жергейра хьун патал чалишмишвалзава. Спортдин школадиз къвез кIандайбур гзаф ава, гьайиф хьи, чи мумкинвилерал сергьят эцигнава.
Зарина Жабраилова
