Кьурагь райондин Шимихуьряй тир Шагьвели Гьасретов вичиз са шумуд патахъай тIебиатди кьетIен пай ганвай инсан я лагьайтIа, бажагьат зун ягъалмиш жеда. 1961-йисуз дидедиз хьайи ам алай вахтунда бажарагълу культработник, гьевескар манидар, устадвилелди чуьнгуьр, тар, далдам, чIагъан, зуьрне язавай музыкант, композитор, шаир, тарихчи я.
Дагъустандин хуьруьн майишатдин институт акьалтIарай Ш.Гьасретова хейлин йисара “Шимихюрский” совхозда, Кьурагьа гьар жуьре къуллугъар тамамарна.
2001-йисалай Ш.Гьасретова Шимихуьруьн Культурадин кIвалин директорвиле кIвалахзава, манидар ва музыкант яз, районда, республикадин шегьерра тухузвай килигунра, фестивалра иштиракзава. Анра тафаватлу хьунай ганвай дипломар, грамотаяр Шагьвелидихъ 10-далай виниз ава.
Ш.Гьасретоваз “Дагъустан Республикадин культурадин лайихлу работник” лагьай гьуьрметдин тIварни ганва.
Шагьвелиди шиирарни теснифзава, музыкани кхьизва, маниярни тамамарзава.
2017-йисан эхирра Кьасумхуьрел кардик квай “Куьредин ярар” культурадин центрада Ш.Гьасретован “Дагъви” тIвар алай ктабни чапдай акъатна. Ада Шимихуьруьн тарихдикай, анай акъатай машгьур инсанрикай кхьенвай очерк ва 81 шиир гьатнава.
Эхь, бажарагълу инсан я Шагьвели Гьасретов. Къуй адахъ кIвалахда, искусстводин рекье, яратмишунра мадни еке агалкьунар хьурай.
Хазран Кьасумов
