2-февралдиз Дербент шегьердин центральный библиотекадин чlехи залда Дагъустан Республикадин лайихлу артист Мияса Дашбалаевна Мурадхановадин яратмишунриз талукьарнавай межлис кьиле фена.
Ана Стlал Сулейманан тlварунихъ галай Лезгийрин госмуздрамтеатрдин директор Динара Эминовади, кьилин режиссер Мирзабег Мирзабегова, лезги ва азербайжан театррин актерри, шегьердин культурадин отделдин кьилин пешекар Гуьлпери Шабановади, шегьердин школайрин лезги чlаланни литературадин муаллимри, общественный тешкилатрин векилри ва Мияса Дашбалаевнадин яратмишунрал рикl алай инсанри иштиракна.
Мярекат ачухай М.Мирзабегова кlватl хьанвайбуруз М.Мурадхановадин яратмишунрин рекьикай суьгьбетна. Кьилди къачуртlа, ада къейд авуна хьи, М.Мурадхановадин бажарагъ иллаки эхиримжи йисара ачух хьанва. Гьар йикъан зегьметдиз ва театрдин искусстводиз вафалувилиз килигна, ам тамашачийрин рикl алайбурукай сад хьанва. Адан уьмуьрдин тежрибадиз ва пешекарвилиз килигна, эхиримжи йисара са шумуд тамашада режиссёрри адаз дидейрин ролра къугъун теклифзава ва абур актрисади лап вини дережада аваз тамамарни ийизва: Р.Гьамзатован “Асиятан рехъ”, А.Исмаилован “Зиярат”, Х.Абдулгапурован “Муьгьуьббатдин къуват”, Н.Ибрагьимован “Московдин диде”, М.Мирзабегован “Булахдин сир”, Э.Наврузбегован “Аладдинан суьгьуьрдин лампа”, “Дустарин йифен гуьруьш” ва масабур.
Динара Эминовади къейд авурвал, М.Мурадхановади театрда кlвалахай йисара сегьнедал жуьреба-жуьре 30 роль къугъванва. Вини дережадин пешекарвал, сегьнеда тамашачийрин рикl вичел желб ийиз алакьун, кьилди вичиз хас тир кьетlенвал ва пешедал рикl хьана кlвалахун — ибур адан хесетдиз хас къилихар я.
Алай вахтунда М.Мурадхановади Х.Тагьиранни Къ.Межидован “Ашукь Саид” тамашада Хатаян роль, И.Шамхалован “Периханум” тамашада Минедин, А.Исмаилован “Аль Мамнунан чирагъ” тамашада Абдалан, М. Шамхалован “Гъуьлуьн диде” — Жанетан ролар чlехи агалкьунралди тамамарзава.
Г.Шабановади вичин рахунра Мурадхановади драмайрин ва къемедайрин жанрайра, гьакlни аялар патал махара жанлу къаматар арадал гъанвайди, адан къугъунрай халкьдин адетар ачухдиз аквазвайди къейдна.
Писатель Сардар Абила, Севда Бейболаевади, и цlарарин авторди, шегьердин УО-дин лезги чlаланни литературадин методобъединенидин руководитель Наида Къарахановади, и мярекат тешкилуник кьил кутур театрдин литдрам паюнин руководитель Эминат Заирбеговади ва масабуру Мияса Дашбалаевнадин тlварцIихъ хуш келимаяр лагьана ва межлис тебрикна.
Мярекатдал М. Мурадхановадин ятармишунрин цlийи чинни ачух хьана.
Малум хьайивал, ада шииратдин хилени кlвалахиз хейлин йисар я. Адан шииратдин чин кlватl хьанвайбуруз театрдин актрисайри: Эмина Вагьабовади, Амалия Керимовади, Назира Агъасиевади, Фатима Фейзулаевади, Сусана Цмиевади раижна. Лагьана кlанда, яб акалай шииррин тематика жуьреба-жуьре ва мана дерин я.
Анал М.Мурадхановадин чlалариз кхьенвай манияр Дагъустандин халкьдин артистар тир Фаризат Зейналовади, Зарифа Къухмазовади, РД-дин лайихлу артист Эльмира Къарахановади, Азербайжан театрдин актриса, РД-дин лайихлу артист Севда Бейболаевади, жегьил манидар Рамик Рамазанова, Гьемзебег Эмиралиева ва масабуру тамамарна, гьакlни тамашайрай чlукарни къалурна.
Са нефесдал алаз кьиле фейи мярекатдин эхирдай М.Мурадхановади шегьердин кьилин библиотекадин руководитель Д.Алиевадиз, межлис тешкилиз куьмек гайибуруз ва вири иштиракчийриз рикlин сидкьидай сагърай лагьана.
Къагьриман Ибрагьимов
