Дагъустандин здравоохраненидин министерстводин сайтда хабар ганвайвал, алай йисуз республикадин районрин ва шегьеррин медицинадин идараяр 400-лайни гзаф цIийи тадаракралди таъминарун къарардиз къачунва. Идакай Дагъустандин здравоохраненидин министерстводи федеральный ведомстводихъ галаз “2021-2025-йисара Дагъустан Республикадин здравоохраненидин хел цIийи хъувунин программаяр” уьмуьрдиз кечирмишунин месэлайрай мукьвара кьиле тухвай селекторный совещанидал малумарна…
ИкI, 2021-йисуз республикадиз некIедин железадин рак вахтунда дуьздал акъуддай ахтармишунар кьиле тухун патал рекъемрин рентгендин 3 маммограф маса къачунин жигьетдай икьрарар кутIуннава. Идалайни гъейри, программадин сергьятра аваз чкадал сифтегьан ахтармишунар кьиле тухун патал тадаракарни маса къачуда. Абурук акатзава: электрохирургиядин аппаратура, флюорографар, УЗИ-дин аппаратар, рентген-установкаяр ва лабораториядин анализаторар, эндоскопар ва икI мад.
Республикадин районрин ва шегьеррин медицинадин идарайрив гьелелиг алава 54 машин агакьнава. Абурун куьмекдалди медикривай, азарлуйрин патарив кIвалериз физ ва я абур азарханайриз агакьариз, абурун анализар лабораторийриз рекье тваз ва маса месэлаяр кьилиз акъудиз жеда.
«Лезги газет»
