Россиядин Силисдин комитетдин Дагъустанда авай Силисдин органри Ахцегь райондин агьали Замир Саидоваз талукь яз  уголовный дело къарагъарнава. Идакай “Лезги газетдиз” РД-дин Силисдин управлениди хабар гана. Адак РФ-дин УК-дин 126-статьядин 2-паюнин “з” (темягькарвилин къаст аваз инсан чуьнуьхун) ва 105-статьядин 2-паюнин “к” пунктарал (маса тахсиркарвал чуьнуьхунин ниятдалди авунвай кьиникь) асаслу яз, тахсир кутунва.

Мусибатдин агьвалат алай йисан 8-январдин йифиз хьана. 7-январдиз шак физвайда Ахцегьрин хуьре чирхчир гада Байрам Омароваз къекъуьн патал  вичин машинда акьахун теклифна. Абур хуьруьн сергьятрай экъечIна.  Замир Саидова Байрамаз, 1,5 миллион манат пул къакъудунин макьсад аваз, гуя ам чуьнуьхнава лагьана, Омарован ди­де-бубадал хабар агакьарун теклифна. Амма Байрам рази хьанач.

Силисдин фикирдалди, ваъ лугьунизни килиг тавуна, Саидова вичин чирхчир экв же­далди машиндай акъуднач. Адаз ам чIа­лал гъиз кIанзавай. Вичин мурад кьилиз акъат тийидайди чир хьайила, шак физвайда Байрам Ахцегь райондин Чеперин хуьруьз мукьва мулкарал тухвана ва ам тапанчидай яна. Идалай кьулухъ жегьилдин бедендал чукIул­дин хирерни авуна. Хьанвай залан хирерикди  Байрам Омарова гьа чкадал чан гана.

Вичи есирда кьурди гьатта кьейидалай кьулухъни Саидова адан диде-бубадин телефондин нумрадиз хва азад авун патал винидихъ къейднавай пулдин кьадар къалурнавай телер рекье туна. Райцентрадин агьали полициядин отделдиз малум тушир ксари ви­чин хва чуьнуьхнавайдакай ва ам азад хъуву­най 1,5 миллион манат пул гун истемишза­вай­­­дакай­ хабар гузвай арза гваз атана. МВД-дин фикир­далди, диде-бубадивай пул къакъу­дунин мураддалди инсан чуьнуьхун эвелдай Б.Омарован вичин иштираквал аваз кьиле фенвай. Гьатта жегьилар чпин план кьилиз акъудун патал Дербентдизни рекье гьатнавай. Амма, гуьгъуьнлай малум хьайивал, ибур ви­ри къанлуди туькIуьрнавай къундармаяр тир.

Мейит жагъанвай чкадал силисдин тежри­баяр кьиле тухудайла, Саидова мусибатдин агьвалатдин гьар са легьзе галай-галайвал рикIел хкана. Пул гъиле гьатайла, адахъ рес­пуб­ликадай экъечIдай ниятар авай. Анжах­ и мурадар кьилиз акъатнач. Алай вахтунда уголовный делодай ахтармишунар давам жезва­.

Къейд ийин хьи, тахсиркарвал РД-дин МВД-дин УУР-дин ва РФ-дин ФСБ-дин РД-да­ авай управленидин Дербент шегьердин отделдин къуллугъчийрин куьмекдалди дуьз­дал акъудна. Уголовный делодай силисдин кIвалахар тухун акьалтIардалди судди Саидов кьунин къарар кьабулнава.

«Лезги газет»