Махачкъалада республикадин министерствойринни ведомствойрин регьберрихъ галаз кьиле фейи совещанидал Дагъустандин Гьукуматдин Председатель Артём Здунова вич авай гьаларихъ галаз мукьувай таниш хьун патал вири министерствойриз мугьман жедайдакай хабар гана. Ада гьакIни государстводин гьукумдин федеральный органриз рекье твазвай документар гьазурунив жавабдарвилелди эгечIуниз ва тапшуругъар тамамарна кIанзавай вахт вилив хуьниз эвер гана.
Саласадиз Артём Здунова РД-дин экономикадин ва мулкар вилик тухунин, промышленностдинни алишверишдин, чилерин ва эменнидин алакъайрин министерствойрин коллективрихъ галаз гуьруьшар кьиле тухвана. Ам министерствойрин кIвалахдин асул рекьерихъ, зегьметдин шартIарихъ галаз таниш хьана.
“Экономикадин министерство инфраструктура еримлу хьунин центр хьун лазим я. Капиталдин пуларин асул программаярни ина арадал гъана кIанда”, — къейдна республикадин премьер-министрди.
А.Здунован гафаралди, инвестицийрин сиясат кар алай хел я. Ада экономикадин ва мулкар вилик тухунин министерстводиз и хел еримлу авунин, туризмдин хел патал экономикадин дибар тайинарунин, карчийриз куьмек гузвай фондарихъ ва маса тешкилатрихъ галаз сих алакъаяр хуьнин тапшуругъар гана.
Промышленностдин ва алишверишдин министерстводин руководстводин фикир А.Здунова промышленность еримлу ийидай Фондунихъ галаз авай алакъаяр мягькемарунал, оборонзаказрин кьадар артухарунал желбна. Гьукуматдин Председателдин фикирдалди, Дагъустандин мулкарал хсуси промышленностдин паркар арадал гъунихъ еке метлеб ава. И жигьетдай махсус программани кьабулун мумкин я.
РД-дин чилерин ва эменнидин алакъайрин министерствода кьиле фейи гуьруьшдин сергьятра аваз, къурулушдин вилик акъвазнавай кьилин меэлаяр веревирдна. А.Здунова къейд авурвал, санал кIвалахна, важиблу нормативрин актар кьабулна кIанзава. Адан гафаралди, республикада нормативно-правовой база зайиф тирвиляй и хилез кьетIен фикир гуда.
«Лезги газет»
