Дагъустан Республикадин Кьилин везифаяр вахтуналди тамамарзавай Сергей Меликова 16-мартдиз карчийрин ихтиярар хуьнин рекьяй РФ-дин Президентдин къвалав гвай Векил Борис Титовахъ галаз гуьруьш кьиле тухвана. И мярекатда гьакI РД-дин карчийрин ихтиярар хуьнин рекьяй Векил Мурад Далгатовани иштиракна.
Борис Титова гуьруьшдин сергьятра аваз РД-дин Кьил Сергей Меликоваз, региондин базарриз адет тир (типичный производствояр санал кIватIуналди, промышленный парк тешкилунин теклиф гана.
“Дагъустанда хъендик квай сектор екеди я ва гьа са вахтунда ина производстводин карханаяр (8 процентдив агакьна) тIимил я. Санлай къачурла, республикадин бизнес алишверишда ва хуьруьн майишатда санал кIватI хьанва. Чна Дагъустан Республикадин кьиле авай касдиз вилик финин программадин концепция къалурнава, гьа са вахтунда “адетдин шейэрин” (“простые вещи”) экономикадин месэлани кудна. Кьилди къачуртIа, ихтилат Дагъустандин базарриз адет тир производствояр санал кIватIнавай промышленный паркуникай я. Чахъ инвестицияр кардик кутадай ва хейлин производствойрал чан гъидай сиягь ава. Чун сад-садан гъавурда хъсандиз акьуна ва гьукуматдин куьмек галаз чавай промышленностдин ва гъвечIи бизнесдин производстводин дережаяр хкажиз жеда”, — лагьана Б.Титова.
Мугьманди гъавурда турвал, экономикадин “простой шейэрин” сектордик гзафни-гзаф халкьдин игьтияж авай товарар акатзава: парталар, кIвачин къапар, пластикадикай авунвай шейэр, мебель, яшайишда ишлемишдай алатар, техника ва икI мад. Республикада и жуьредин сектор вилик тухудай еке мумкинвилер ава.
РФ-дин бизнес-омбудсмен Б.Титов республикада аваз кьвед лагьай югъ я. РД-дин Кьилин везифаяр вахтуналди тамамарзавай С.Меликовалай гуьгъуьниз мугьман республикадин прокурордин сад лагьай заместитель Р.Ляпинахъ галазни гуьруьшмиш хьана. Абур санал бизнесменрин арзайриз килигна.
«Лезги газет»
