12-мартдиз чи машгьур ватанэгьли, Россиядин Федеральный Собранидин Федерациядин Советдин член Сулейман Керимован 55 йис тамам хьана. Адаз и лишанлу вакъиа Дагъустандин Кьилин везифаяр вахтуналди тамамарзавай Сергей Меликова мубаракна.
“Гьуьрметлу Сулейман Абусаидович, чи патай тебрикдин гафар кьабула. Хайи республикадиз датIана фикир, хци месэлаяр гьялунин карда куьмек гунай, мукьвара Федерациядин Советда кьиле фейи Дагъустандин йикъара иштиракунай чна Квез сагърай лугьузва. Чав гзаф къиметлу теклифар агакьна. Чун абуру сенаторрин куьмекдалди республикада вилик финин камар мадни йигинардайдахъ инанмиш я”, — къейдна Сергей Меликова, Сулейман Керимоваз яргъи уьмуьр ва мадни еке агалкьунар хьун алхишуналди.
15-мартдиз Россиядин Президент Владимир Путинан Указдалди Сулейман Керимоваз Дуствилин орден гана. Ам и чIехи шабагьдиз уьлкведин жемиятдинни сиясатдин уьмуьрда активнидаказ иштиракунай, мергьяматлувилин серенжемрик еке пай кутунай ва яргъал йисара Ватан патал намуслувилелди кIвалахунай лайихлу хьанва.
Дагъустандин Госсекретарь Хизри Абакарован фикирдалди, орден гун Сулейман Керимова уьлкве, кьилди къачуртIа, Дагъустан яшайишдинни экономикадин жигьетдай вилик финик кутунвай чIехи пай къейд авун я.
“Сулейман Керимова азарлубуруз, дарда авай хизанриз куьмекар гузва, кесибдаказ яшамиш жезвайбур вичин хсуси такьатрихъ гьаждал рекье твазва. Коронавирусдихъ галаз женг тухунин кардани чи баркаллу ватанэгьлиди вичин гьунарар къалурна. Урусатдин виридалайни къадим Дербент шегьер, адан алахъунар себеб яз, дегиш жезва, вири рекьерай вилик физва.
Сулейман Керимован лайихлувилер гьисабна куьтягь жедач. Куьмекдихъ муьгьтеждаз гъил яргъи авунай за ваз сагърай лугьузва. Мад сеферда лайихлу хьанвай шабагь мубаракрай!” — кхьенва Хизри Абакарова Инстаграмда авай вичин аккаунтда.
“Лезги газетдин” редакциядин коллективдини Сулейман Абусаидович Керимоваз 55 йис тамам хьун ва Дуствилин орден рикIин сидкьидай мубаракзава. Вахъ чандин сагъвал, яргъи уьмуьр, мадни еке агалкьунар хьурай, баркаллу ватанэгьли!
«Лезги газет»
