Накь Бурятиядин меркез Улан-Удэ шегьерда азаддаказ кьуршахар кьунай Россиядин чемпионат гатIуннава, ам 15-мартдалди давам жеда. Акъажунар алай йисуз кьиле фидай Олимпиададин къугъунрин вилик квайвили абурун кесерлувал мадни хкажзава.
Россиядин чемпионатда чи миллетдин векилар тир 5 спортсменди чпин устадвал ва алакьунар къалурда. Ингье абур: Абдулкерим Гъаниев (57 кг), Рустам Къараханов (61 кг, ибур кьвед — Москвадин патай), Рамазан Ферзалиев (65 кг), Даурен Куругълиев (86 кг) ва Рамазан Шабанов (92 кг, ибуру пудани Дагъустандин хкянавай командадик кваз иштиракда).
Чи спортсменрикай виридалайни къизгъин бягьс (86 кг-дал къведалди заланвал авайбурун арада) Даурен Куругълиеван ва Кеферпатан Осетия-Алания республикадай тир Артур Найфонован арада кьиле фин гуьзлемишзава. И бягьсина гъалиб хьайи спортсменди Токиода кьиле фидай Олимпиададин къугъунрани вичин гьунарар къалурда. Виликамаз авай делилралди, къе, 11-мартдиз, заланвилин и категориядай сифтегьан (хкядай ва ярумчух финалдин) бягьсер кьиле фида. Накь газет чапдиз вахкудайла, Д.Куругълиевахъ галаз телефондай кьиле фейи рахунрай чир хьайивал, чи вири кьегьалри, чпин къуватар ва вахт гьайиф татана, важиблу бягьсериз хъсан гьазурвал акунва, гуьгьуьларни кIубан я.
Къуй газетдин гуьгъуьнин нумрада чна абурун агалкьунрикай муштулухар гудайвал хьурай!
«Лезги газет»
