(Эвел — 9-нумрада)

Ахпа адан патав “Буракь” тIвар алай гьайван гъана. Муслима Анас ибн Маликалай ихьтин гьадис агакьарзава: “Зи патав Буракь шив гъана. Ам лагьайтIа, яргъи ва лацу гьайван тир, ламралай — кьакьан, къатирдилай — аскIан. Ам вилериз аквазвай кьван чкайрив гьасятда агакьзавай, яни гзаф зарбдиз фидай гьайван тир. Зун шивцел алаз рекье гьатна. Байт-уль-Мукъаддасдихъ агакьдалди, чун Мединада акъваз хьана, кьве кьил капIни авуна.

ГьакIни чун Мадян лугьудай чкада, Му­са­­ пайгъамбардин (Аллагь рази хьурай ви­­челай) тарцин патав акъвазна ва гьанални кьве кьил капI авуна, рехъ давамарна. “ТIу­ру Сайна” лугьудай дагъдиз мукьва хьана­.

И чкадилай Муса пайгъамбар (Аллагь рази хьурай вичелай) Аллагь-Тааладихъ галаз са перде амаз рахайди тир. Инални за кьве кьил капI авуна ва чун Марьяман хва Иса пайгъамбар (Аллагь рази хьурай вичелай) дидедиз хайи чкадал агакьна, за гьанални кьве кьил капI авуна”.

Гьар акъваз хьайи чкадал Жабраил ма­лаикди (Аллагь рази хьурай вичелай) чи Пайгъамбардивай (къуй Аллагьдин патай салават ва саламар хьурай вичиз) хабар кьазвай: “Ваз чизвачни, я РасулалЛагь, ву­на гьинал капI ийизватIа?” Пайгъам­бар­дин (къуй Аллагьдин патай салават ва саламар хьурай вичиз) ваъ лагьай жавабдиз, Жабраил малаикди (Аллагь рази хьурай вичелай) адаз гьасятда баянар гузвай.

Иерусалимда авай аль-Акъса мискIин­див агакьайла, Пайгъамбарди (къуй Аллагьдин патай салават ва саламар хьурай ви­чиз) вичин Буракь шив, вири пайгъам­барри чпин гьайванар кутIунзавай чкадал гъана, уьнуьгдал кутIунна. МискIиндиз гьахьна, имамвиле акъвазна, вири пай­гъам­баррихъ галаз санал кьве кьил капI авуна.

МискIиндай экъечIайла, адан патав кьве къаб гъиле аваз Жабраил малаик (Аллагь рази хьурай вичелай) атана ва абурукай сад хкягъун эмирна. Абурукай сада — чехир, муькуьда нек авай.

Чи Пайгъамбарди (къуй Аллагьдин патай салават ва саламар хьурай вичиз) лагьайтIа, гьелбетда, нек авай къаб хкяна. Жабраил малаикди (Аллагь рази хьурай вичелай) адаз лагьана: “Гьакъикъатда, вуна михьивал хкяна”.

Са тIимил вахтунилай абур сад лагьай цаварал хкаж хьана. Жабраил малаикдивай (Аллагь рази хьурай вичелай) сада хабар кьуна: “Вун вуж я?”. Ада жаваб гана: “Жабраил”. “А вахъ галайди вуж я?” Ада жа­ваб гана: “Мугьаммад”.

“Ам илчи яни?”. “Эхь, ам илчи я”, — жаваб гана Жабраила (Аллагь рази хьурай вичелай). Гьа икI сад лагьай цаварин утагъдин варар Адам пайгъамбарди (Аллагь рази хьурай вичелай) ачухна, Мугьаммад пайгъамбардиз (къуй Аллагьдин патай салават ва саламар хьурай вичиз) салам гана ва Аллагь-Тааладивай адаз хушбахтвал ва няметар тIалабна.

Кьвед лагьай цаварал хкаж хьайила, абуруз гьа са жуьредин суалар гана ва талукь тир жавабарни хгана. И жуьре, гьар са цавув агакьайла, давам хьана.

(Кьатl ама)

Абдулзагьир  Атаханов