Чи ватанэгьлияр — гьар сана
Дамахдивди къейд ийиз жеда, чахъ дуьньядин дережада спортдин жуьреба-жуьре рекьерай чIехи агалкьунар хьанвай машгьур пагьливанар гзаф ава. Ахьтинбурун жергедай яз, чавай чи йикъара машгьур хейлинбурун тIварар кьаз жеда: Радик Исаев, Гьабиб Аллагьвердиев, Алим Селимов, Альберт Селимов, Жавид Гьамзатов, Жабар Аскеров, Замира Рагьманова, Даурен Куругълиев, Эльдар Алискендаров, Радик Къулиев, Зубаир Келбалиев, Рамазан Ферзалиев, Мугьаммед Эминов ва мсб.
Дуьньяда машгьур лезги пагьливанрин и жергеда вичин ери-бине Докъузпара райондин Усугъчай хуьряй тир, уьлкведин меркезда яшамиш жезвай Гьажи Надирович Наврузовани гьахълудаказ кьетIен чка кьазва. Ам тайский боксдай дуьньядин чемпионвилин тIварцIин сагьиб я.
Гьажи Наврузов 1989-йисан 11-апрелдиз Махачкъалада дидедиз хьана. Адан буба Надир Наврузов тайский боксдин рекьяй Россиядин лайихлу тренер, судья я. 1997-2008-йисара ам Москвада тайский боксдин федерациядин кьиле акъвазна. Надир Наврузов хизанни галаз Дагъустандай Москвадиз куьч хьайила, гъвечIи Гьажидин ирид йис тир. Тажуб жедай кар туш, лайихлу тренердин тербиядик кваз чIехи хьайи аялдикайни гележегда зурба пагьливан хкатна.
Гьажи пешекар футболист, кикбоксер, тайский боксер, “Top Dog FC” лигадин бегьлеяр алачиз кьиле тухузвай женгерин иштиракчи я. КьецIил гъутаралди кьиле физвай женгерикай рахайтIа, ана жезвайбур “къияматдин” кукIунар я. Адан бягьсериз интернетдин YouTube-дай килигиз жеда.
Гьеле аялзамаз спортдал рикI алаз чIехи хьайи Гьажиди иллаки футболдиз итиж ийизвай. Гьавиляй ада Москвада футболдин Динамо школада чирвилер къачуна. Пешекар футболист хьиз, ам “Спортакадемклуб” (2009), “СКА-Энергия” (2010-2011), 2013-2014-йисара Твердин “Волга” командайрик кваз къугъвана.
Машгьур пагьливанди физкультурадин, спортдин, жегьилрин ва туризмдин рекьяй Россиядин гьукуматдин университет куьтягьнава.
ТIарвал хьайидалай кьулухъ духтуррин теклифдалди Гьажиди футболдал машгъул хьун акъвазарна. Амма спортдин са шумуд жуьредиз майилвалзавай пагьливанди тайский боксдани кикбоксингда вичин алакьунар ахтармишун кьетIна. Къейд ийин, лайихлу тренердин-насигьатчидин хва тирвиляй спортдин и жуьрейрин сирерикай адаз хабар авай. 2016-йисуз ада 91 килограммдилай виниз заланвал авайбурун арада тайский боксдай Россиядин чемпионатда гимишдин медаль къачуна. ЧIехи акъажунрин финалдиз акъатай лезги пагьливан гуьгъуьнлай РФ-дин хкягъай спортсменрин кIва-тIалдик кутуна. 2016-йисан эхирра ада мад са еке агалкьун къазанмишна — Гьажидикай тайский боксдай Казанда кьиле фейи дуьньядин акъажунра Кубокдин сагьиб хьана.
2018-йисан мартдиз тайский боксдай Бангкокда кьиле фейи дуьньядин чемпионатда ада гъалибвал къачуна.
Идалай вилик ада ММА-дай гьевескар спортсменрикай ибарат Москвадин чемпионатдани вичин устадвал къалурнай. Россиядин “Top Dog FC” тешкилатда ада 2020-йисалай иштиракзава. Махсус бегьлеяр алачиз кьетIен жуьреда тешкилзавай акъажунра кьиле тухвай 5 бягьсинани ада гъалибвал къачунва. Алакьунар авай чи ватанэгьлидал спортдин алемда “Автомат” тIвар акьалтнава.
Гьажидин хизанда са хва чIехи жезва. Бубади хцел грекрин риваятрин игит Ахиллесан тIвар эцигнава.
Чи мурад зурба пагьливандихъ мадни еке агалкьунар хьун я.
«Лезги газет»
