Куь ихтиярар
Садазни сир яз амач, алай вахтунда республикадин вири пипIера кардик квай МФЦ-дин идарайра агьалийриз чарар-цIарар туькIуьрдай, кьезилвилер тайинардай, жуьреба-жуьре къуллугъар регьятдаказ кьилиз акъуддай къулайвилер тешкилнава.
Эменни тIимил авайбурун жергедик акатзавай хизанарни МФЦ-да тестикьариз жезва.
Малум тирвал, яшамиш хьун патал лазим тир агъа кIанин кьадар гьар садал гьалт тийизвай хизанар эменни тIимил тирбур яз гьисабзава. Яшамиш хьун патал лазим тир агъа кIанин кьадарни, адет яз, регионрин дережада жуьреба-жуьре тайинарзава. Эменни тIимил авайди яз тестикьарайла, ахьтин хизандиз яшайишдин рекьяй гьукуматдин патай куьмек, кьезилвилер талукь жезва. Гьукуматди ихьтин куьмек алава такьатар гуналди, тайин къуллугърин гьакъи гун патал субсидияр чара авуналди кьилиз акъудзава. И жигьетдай тамам малуматар МФЦ-дин къуллугъчийривай хабар кьуна, чириз жеда.
ТIвар кьунвай кьезилвилерикай менфят къачун патал сифте нубатда эменни тIимил авай хизан тирди тестикьарун лазим я. И месэлани ватандашривай МФЦ-дин идарада гьялиз жеда. Жував ихьтин документар хьун герек я: диде-бубайрин паспортар, аялар хайивилин гьакъиндай шагьадатнамаяр, СНИЛС, эхиримжи пуд вацра атай къазанжидин (доход) гьакъиндай справка. И документар агакьарайдалай кьулухъ 10 йикъан къене махсус справка гун лазим я.
«Лезги газет»
